यल बन्द लितकयाः थौं वार्ताय् वनीगु

यल (झीगु स्वनिगः)

आन्दोलनय् क्वहां वयाच्वंपिं यलवासीतय्त सरकारं वार्ताय् सःतूगुलिं थौं मंगलवाःया यल बन्दयात लितकाःगु दु । मल पोखरी संरक्षण संघर्ष समितिं आइतवाःनिसें लगातार स्वन्हु तक बन्द यायेगु धकाः घोषणा यानातःगु खःसा म्हिगः सोमवाः सरकारं वार्ताय् वयेत मध्यस्थकर्ताया माध्यमं खँ छ्वयाहःगुलिं अथे थौं मंगलवाः वार्ताय् वनेगु अले थौंया बन्द तकं लितकाःगु खः ।

येँया थापाथलीं चीकूपिं सुकुम्वासीतय्त यलया घोविघाट लागाय् तयेत्यंगु विरोधय् स्थानीयवासीतसें यल बन्द आह्वान याःगुलिं अनया जनजीवन म्हिगः सोमवाः नं प्रभावित जूगु दु । म्हिगः नं सुथंनिसें हे स्थानीय मनूत सतकय् प्रदर्शन याःगु खःसा अन प्रदर्शनया झ्वलय् घोविघाटय् ल्वापु तकं जूगु खः । ल्वापुइ लानाः छगू दर्जनं मल्याक प्रदर्शनकारीत घाःपाः जूगु खः ।

स्थानीयवासीया उगु आन्दोलनयात लिपांगु इलय् वयाः ज्यापु समाज यल, बौद्ध विहार संघ नापं थीथी राजनीतिक दलतय्सं तकं समर्थन याःगु खः ।