मर्रे, सोङ्गा विम्बल्डनया सेमीफाइनलय्

प्यंगूगु वरियताया घरेलु कासामि एण्डी मर्रे विम्बल्डन टेनिसया सेमीफाइनलय् दुहांवंगु दु । मुर्रें न्हय्गूगु वरियताया स्पेनिस कासामि डेभिड फेररयात बुकाः सेमीफाइनलय् दुहांवंगु खः ।

बेलायती कासामि मुर्रें स्पेनिस कासामि फेररयात ६-७, ७-६, ६-४ व ७-६ या सेटं बुकूगु खः । सेमिफाइनलय् आः मुर्रें फ्रान्सया जो विलफ्रेड सोङ्गालिसे म्हिती । न्यागूगु वरियताया सोङ्गां जर्मन कासामि फिलिप कोल्सक्रेबरयात ७-६, ४-६, ७-६ व ६-२ या ल्याखं बुकूगु दु ।

अथेहे मिसापाखे निगूगु वरियताया भिक्टोरिया अजारेन्का नं सेमीफाइनलय् दुहांवंगु दु । अजारेन्कां वरियता विहिन कासामि तामिरा पास्जेकयात ६-३ व ७-६ या ल्याखं बुकूगु खः । आः लगातार निक्वःखुसी विम्बल्डनया सेमिफाइनलय् दुहांवंम्ह अजारेन्कां फाइनलय् दुहांवनेगु लागि अमेरिकी कासामि सेरेना विलियम्सलिसे म्हितीगु जूगु दु । अष्ट्रेलियन ओपन त्याकूम्ह अजारेन्का फाइनलय् दुहांवन धाःसा शीर्ष वरियताया मारिया सारापोभायात लिउने लाकाः शीर्ष थासय् लाःवनी ।

अथेहे स्वंगूगु वरियताया अग्निस्का राड्वान्स्का नं रुसी कासामि मारिया किरिलेन्कोयात ७-५, ४-६ व ७-५ या सेटं बुकाः विम्बल्डनया सेमिफाइनलय् दुहावन । आः च्यागूगु वरियताया एन्जिलिक कर्वरलिसे म्हितीगु जूगु दु ।

More Stories Like this