पार्टी एकता छुकिया नितिं ?

नेपालय् अग्रगामी कार्ययोजना हयाः देशया ख्वाः हिलेगु नितिं झिदँया महान् जनयुद्ध यानाः अले उकिया हे जगय् न्हुयाः ऐतिहासिक जनआन्दोलन लिपा २५० दँ पुलांगु केन्द्रिकृत सामन्ती व्यवस्थाया नाइके राजतन्त्रयात नारायणहिति दरबारं नागार्जुन जंगलय् वांछ्वयेत ताःलाःकूगु पार्टी थौं विभाजनया सिथय् थ्यनाच्वंगु दु । पार्टीया निर्णय व प्रक्रियायात हाचां गायाः न्ह्याबलें चाकुगु माकुगु खँल्हानाः पार्टीया नेता व कार्यकर्तातय्त लखय् मिखा कंकाः वःम्ह पार्टीया नायः प्रचण्डयात पार्टी विभाजनया अन्तिम अवस्थाय् तसकं हे नुगः स्यातथें खँल्हायेमखु धायेक धायेक नं मंगलवाः क्रान्तिकारी विचार समूहया शीर्ष नेता व पार्टीया वरिष्ठ न्वकु मोहन वैद्य किरणया छेँय् वनाः पार्टी एकता यायेगु विषयलय् छलफल याःगु दु । छलफल यायेगु धयागु बांमलाःगु खँ मखु । गुज्वः गुज्वःपिं शत्रुत नाप नं छलफल खँल्हाबल्हा जुइधाःसा पार्टीया नायः प्रचण्डनाप खँल्हायेगुली आपत्ति यायेमाःगु छुं हे मदु । छलफल जुइ, छगू चरण पूवन ।

तर छलफलया विषयवस्तुइ पार्टीया नायःगुलित गम्भीर व इमान्दार ? धयागु न्ह्यसः महत्वपूर्ण खः । प्रचण्डं पार्टीया पुलांगु निर्णय व पार्टी प्रक्रिया फुक्कं खुसिइ चुइकाः छ्वयेधुंकूगु दु । पार्टीं संविधान व सेना समायोजन नापनापं यंकेगु धाल । तर प्रचण्डं संविधानयात ध्याक्वय् वांछ्वयाः एकतर्फीरुपं सेना समायोजनया नामय् जनसेनायात अप्वःयासें बेइजतीपूर्ण विघटन यानाबिल । थुगु कथं पार्टी निर्णय विपरित वनाः प्रचण्डं संविधान दयेकेगु खँय् तःधंगु भूल यानाबिल । उकिया हे लिच्वः खः संविधानसभाया विघटन । थुगुकथं संविधान व शान्ति प्रक्रिया थौं असफल जूवंगु दु । थःपिनिगु कार्यनीति असफल जुइवं नेता असफल जूगु खः, पार्टीया नायः प्रचण्ड असफल जूगु खः । आः वय्कलं उकियात कयाः क्षमा फ्वनेमाः, व असफलताया कारण थः जूगुलिं आः वय्कलं पार्टीया नायः पदं राजीनामा बियाः नेतृत्व पुचलं ब्यागलं च्वनेमाः । तर वय्कः थप सक्रिय जुयाः पार्टीया नायः पद त्वःताः हानं महाधिवेशनं नायः जुइगु दाउपेचय् संलग्न दु । देशया राष्ट्रपति जुइगु सुरसारय् दु ।

पार्टी एकता जुइमाः । थ्व खँ पार्टीया नेता, कार्यकर्तानिसें पार्टीया शुभचिन्तक व आमजनताया तःधंगु इच्छा व चाहना दु । तर एकता छुकिया नितिं ? अनेकौं छलछाम व बदमासी यानाः सरकारय् च्वनेगु नितिं एकता यायेगु ? भारतया दलाली यायेत एकता यायेगु ? वा साम्राज्यवादी अमेरिकाया चाकडी यायेत एकता यायेगु ? छाय्धाःसा पार्टीया जनविद्रोहया लाइनयात त्वःताः जनवादी क्रान्ति सम्भव मदु व जनवादी क्रान्तिविना नेपालय् कम्युनिष्टतय्गु छुं ज्याभ्mवः ल्यं दनिथें मताः । छु प्रचण्डपिनिगु समूह जनवादी क्रान्तिया पक्षय् दनिला ? पार्टीया क्रान्तिकारी नेता, कार्यकर्ता व आमजनताया मिखाय् जनसेनाया विघटन लिपा प्रचण्ड बिचाः समूह थुगु क्रान्तिं पिहां वनेधुंकल उगु समूह आः बहुदलीय जनवादी धयागु एमालेया पुलांम्ह मूछ्याञ्जे मदन भण्डारीया राजनीतिइ दुहां वनेधुंकल व एमालेया पार्टीनाप एकीकरण यायेगु प्रक्रियाय् थ्यने धुंकूगु दु । नेपालय् क्रान्ति आः प्रचण्ड समूहपाखे सम्भव मजुइगु जुइधुंकल । छु क्रान्तिकारीतय्सं प्रतिक्रान्तिकारीत नाप पार्टी एकता याइला ?

पार्टी एकताया खँल्हाबल्हाया भ्mवलय् प्रचण्डं थःगुपाखें गल्ति जूगु जक मधाः क्रान्तिकारी विचार समूहपाखें नं गल्ति जुल धयाः गल्ति थःपाखे जूगुयात गौणरुपं काःगु प्रष्ट दु । अर्थात गल्ति निख्यरं नं जुल । थ्व खं स्वयेबलय् सामान्यथें च्वंसां यथार्थय् खुँ खुइगु जक गल्ति मखु, खुइकूम्ह व्यक्तियात नं अपराधी घोषणा यायेगु संकेट खः । थथे धयागु अर्थ गल्ति स्वीकार मयायेगु खः । अर्थात क्रान्तिकारीतय्त छकय् यायेगु, धों लायेगु व वइगु भेलायात स्थगित याकेगु, क्रान्तिकारी नेता कार्यकर्तातय्त अनेकौं लोभ लालच बियाः थःपाखें सालेगु थप षड्यन्त्रया जाः ग्वयेकेगु खः । प्रचण्ड समूहपाखें आः षड्यन्त्रया जाः ग्वयेगु बाहेक मेगु छुं नं सकारात्मक सोच तयेगु व्यकार जुइ । एकताया छलफल नं उकिया छगू नकारात्मक ब्व बाहेक मेगु छुं जुइथें मताः ।

More Stories Like this

चिकंया भाः कुहांवलं नं नेपालय् छाय् लागू मजूगु ?
संघर्ष समितियात सक्रिय याये
थौं मजदुर दिवस
जातीय पहिचानयात कयाः दलतय्गु दथुइ सहमति
हाकनं पेट्रोलया अभाव