चिकंया भाः कुहांवलं नं नेपालय् छाय् लागू मजूगु ?

अन्तर्राष्ट्रिय बजारय् कच्चा पेट्रोलियम पदार्थया भाः कुहांवःगु दु । वंगु च्यालाया दुने कुहांववं न्यूनतम विन्दुइ थ्यंगु दु । न्यूयोर्कस्थित मर्कन्टायल एक्सचेञ्जया इलेक्ट्रोनिक्स टे«डिङ्गय् कच्चागु चिकं प्रति ब्यारेल ८१ डलर ८३ सेन्ट जूगु खः । थ्व भाः वंगु शुक्रवाःया तुलनाय् १ डलर २५ सेन्ट म्हो खः । उखे लण्डनय् नं आईसीई फ्युचर्स एक्सचेञ्जय् नं कच्चा चिकंया भावय् १ डलर १७ सेन्टय् मीगु याःगु खः । थथे चिकंया बजार भाः क्वहांवःगु कारण धयागु अमेरिकाया श्रम बजार वयाच्वंगु संकुचन खः । श्रम बजारय् संकुचन खनेदयेवं चिकंया भाः क्वहांवःगु दु । श्रम बजारय् वइगु संकुचनं चिकंया बजारय् न्ह्याबलें नकारात्मक लिच्वः त्वःतेगु यानाच्वंगु दु ।

अन्तर्राष्ट्रिय बजारय् चिकंया भालय् वंगु लच्छिया दुने जक २३ प्रतिशतं कुहांवयेधुंकूगु दु । तर अन्तर्राष्ट्रिय चिकंया बजारय् मूल्य थहांवनकि चिकंया भाः थकयाः वःम्ह नेपाल आयल निगमं धाःसां भाः कुहांवयाच्वनं नं मस्यू पहछु यानाः भाः क्वकाःगु दु । भाः थहांवनकि भाः थकाये सःम्ह निगमं भाः कुहांवलं नं छाय् भाः क्वःमकाःगु खः ? भाः थकायेत जक मूल्य समायोजन यायेमाःगु खःसा थ्व तप्यंक हे आम जनतायात शोषण यायेगु खँ खः । अन्तर्राष्ट्रिय क्षेत्रय् चिकंया भाःकथं मूल्य समायोजन यानावःपिंसं अन्तर्राष्ट्रिय बजारय् चिकं भाः कुहां वयाच्वंगु उलिमसि महिना दतं नं नेपाल आयल निगमं मूल्य समायोजनया आधारय् भाः क्वकाःगु मदु ।

चिकंया मूल्यय् कमि जुइवं थुकिं मुद्रास्फ्रीर्तिइ नं कमि वइ । आर्थिक नीति निर्मातातय्त नं आर्थिक व वित्तीय क्षेत्रय् सुधार यायेत तःधंगु मौका व अवसर दइ । आर्थिक क्षेत्रय् तःधंगु विकास यानाच्वंगु देय्तय्त नं ब्याज दर म्हो यायेत तःधंगु ग्वाहालि जुइ । तर विडम्बना नेपाल आयल निगमं चिकंया भाः क्वकायेगु ला बिचाःतक्कं नं याःगु मदुनिगु जक मखु, चिकंया हाहाकारयात तक्कं चीकेपूmगु मदुनि । बजारय् ग्यासया अभाव यथावत दु । छगः ग्यास कायेत नं पेट्रोल कायेथें हे लाइन च्वनेमाः, थौं मखु कन्हय्या शब्द न्यं न्यं उपभोक्तात वाक्क दिक्क जुइधुंकूगु दु । १४ गते तक्क भाः थकायेमखु धयावयाच्वंगु निगमं अन्तर्राष्ट्रिय ख्यलय् चिकंया भाः कुहांवयाच्वंबलय् मेमेगु हे कारणत न्ह्यःनेतयाः अःखतं चिकंया भाः थकायेत बेर मदु ।

भ्रष्टाचारय् चुर्लुम्म दुबय् जुयाच्वंगु निगमयात सुधार यायेमाःगु प्रस्तावित खँत भ्वाःथःगु दराजय् थन्कय् जुयाच्वंगु दु । सुधारात्मक पलाः मछिसे निगमयात धेबा त्याय् बियाः वा अनुदान बियाः भ्रष्टत लहीगु ज्या बाहेक सरकारं मेगु यायेगु बिचाः तक्क नं याःगु मदुनि । थुज्वःगु अवस्थाय् चिकंया भाः क्वकायेगु स्वयाः थकायेगु बाहेक मेगु निगमं मेगु याइ हे मखु । थुलि स्पष्ट दु ।

More Stories Like this

पार्टी एकता छुकिया नितिं ?
संघर्ष समितियात सक्रिय याये
थौं मजदुर दिवस
जातीय पहिचानयात कयाः दलतय्गु दथुइ सहमति
हाकनं पेट्रोलया अभाव