जातीय पहिचानयात कयाः दलतय्गु दथुइ सहमति

संघीयतायात कयाः तप्यंक हे विरोध यानाजूपिं चित्रबहादुर केसीया राष्ट्रिय जनमोर्चा बाहेक शीर्ष दलया शीर्ष नेतातय्सं नं संघीयतायात तप्यंक विरोध मयासे चाःहीकाः विरोध यानाः वयाच्वंगुया ल्यूने धयागु संघीयताय् मवनेगु हे खः । नेपाली कांग्रेस, एमाले लगायत दलतय्सं संघीयता थःपिनिगु एजेन्डा मखुगु व उकियात फयांफक्को अस्पष्टरुपं थःपिं संघीयताया विरोधीकथं न्ह्यःने मवनेगुया आधारय् न्ह्याःवयाच्वंगु खँ आः स्पष्ट जुजुं वयाच्वंगु दु । संघीयताया तप्यंक विरोध यात धाःसा थःपिनिगु भविष्य सफाचट् जुइगुलिं कांग्रेस – एमालें थुगुकथं विरोध व समर्थनया दथुं न्ह्याःवयाच्वंगु खः ।

संघीयताया तप्यंक विरोध मयासे कांग्रेस व एमालें जातीय पहिचानया आधारय् राज्य वा प्रदेश दयेके मज्यू धयावयाच्वंगु दु, थुकिया ल्यूने इमिगु तर्क दु, देश कुचा जुइ । इमिसं थ्व खँ छु खँया आधारय् धयाच्वना धयागु खँय् वय्कःपिं नं स्पष्ट मदु । जातीय पहिचानया आधारय् दयेकूगु छगू निगू देशय् फुट नं वल जुइ, देय् कुचा नं दल जुइ । तर थ्व ला मनासिब तर्क मजुल । संघीयताया कारणं यक्कों देशय् प्रगति जूगु दु, खुसियाली हःगु दु, सुखी जीवन हःगु दुसा – छगू निगू देशया नकारात्मक परिणामयात न्ह्यःनेतयाः अग्रगामी दिशाय् पलाः मतयेगु प्रतिगामी विचार जुल । कांग्रेस, एमालेया थ्वहे प्रतिगामी बिचारया कारण देश ल्यूनेलाःगु खः । माओवादीं देशय् संघीयता हल, गणतन्त्र हल, धर्म निरपेक्षता हल, अग्रगामी दिशाय् देशयात न्ह्यःने यंकल । देशय् तःधंगु हिउपाः वल । परिवर्तनं देशया ख्वाः हे हिले धुंकल । तर कांग्रेस, एमाले वहे आजु पुलांगु विचार व शैलीइ लसपस जुजुं थःपिंत हिलेमफुत । थौं कांग्रेस, एमाले राजनीतिक थुगु अवस्थां कोशं ताःपाक्क च्वनाच्वंगु दु, गुकिया कारणं प्रतिगामी शक्तिया भूमिका म्हिताः न्ह्यःने वनेत स्वयाच्वंगु यच्चुक सीदु । लिच्वः कथं कांग्रेस, एमाले थौं नं नेपाःमि जनताया सोंच व समझं यक्कों ताःपाना च्वंगु दु ।

कांग्रेस – एमालेदुने च्वनाच्वंपिं आदिवासी जनजातित दनावल । जातीय पहिचानया आधारय् प्रदेश दयेकेमाःगु मखुसा पार्टी हे परित्याग यानाः जातीय पार्टीत चायेकाः न्ह्याःवनेगु खँ पिहांवयेवं जातीय पहिचानया विरोध याना वयाच्वंगु कांग्रेस – एमालेया न्ह्यःचब्बुत व रातारात कांग्रेस – एमालेया चेत खुले जुल ।

म्हिगःतक्क जातीय पहिचानया आधारय् राज्य वा प्रदेश दयेके हे मज्यू धयावयाच्वंपिं कांग्रेस – एमालेत आः वयाः जातीय पहिचानया आधारय् राज्य दयेके माःगु खँय् सहमतिइ कुहांवःगु दु । नेपाली कांग्रेसया न्ह्यगू प्रदेशय् सहमति याना वयाच्वंगु एमाले नं आः १३ गू प्रदेशया प्रस्ताव न्ह्यःने हयेवं १४ गूया प्रदेशय् सहमति जुइगु स्पष्ट संकेत खनेदुगु दु । फुक्क जाति, फुक्क शक्ति व सामथ्र्यया आधारय् उपयुक्त १४ गू प्रदेशं आः साकार रुप काइगु खनेदु । जातीय पहिचानया नितिं आदिवासी जनजातितय्गु ऐक्यबद्धता व संघर्षया मानसिकतायात थुइकाः इलय् हे १४ गू प्रदेशय् वंगु खःसा शीर्ष नेतातय्सं ताःहाकःगु सहमतिया नाटक नं म्हितेम्वाःलीगु खः । लिबाक्क हे थजु, सहमतिइ वल बुद्धि पुरेयात हे धायेमाः ।

More Stories Like this

पार्टी एकता छुकिया नितिं ?
चिकंया भाः कुहांवलं नं नेपालय् छाय् लागू मजूगु ?
संघर्ष समितियात सक्रिय याये
थौं मजदुर दिवस
हाकनं पेट्रोलया अभाव