हाकनं पेट्रोलया अभाव

संविधान पिकायेगु अन्तिम ई म्हो जूलिसें सहमतियात कयाः तितिं न्हुयाच्वंगु असामान्य अवस्थाय् पेट्रोल आपूर्तिइ ४० प्रतिशतं म्हो जुइवं हाकनं सतकय् गाडी चलय् जुइगु संख्याय् अप्रत्यासितरुपं म्हो जूगु दुसा पेट्रोल, डिजेल काइपिनिगु लाइन ताःहाकः जुजुं वनाच्वंगु दु । निभाः तसकं कडा जुजुं वनाच्वंगु अवस्थाय् नापं न्हिच्छि लाइन च्वनाः पेट्रोल कायेत सवारी साधनया धनीत बाध्य जुयाच्वंगु दु । नेपाल आयल निगमं १ अर्ब धेबा भारतीय आयल नियमयात पुलेल्यं दनि धकाः ४० प्रतिशत आपूर्ति म्हो याःगु खः ।

पेट्रोलया आपूर्ति म्हो जुइवं पेट्रोल कम जक बीगु याइ । निगू प्यंगू पेट्रोल पम्प बाहेक येँया अधिकांश पेट्रोल पम्पत मचाः व ‘पेट्रोल छैन’, ‘डिजेल छैन’ धकाः साइनबोर्ड झुनय् यानातःगु स्वयाः गाहाकित लिहांवनेत बाध्य । पेट्रोल व डिजेल उत्तिकं माःगु व नियमितरुपं आपूर्ति जुइमाः धाःसा नेपाल आयल निगमया व्यवस्थापन व लापर्वाहीया कारण सहज आपूर्ति यायेपूmगु मदु । प्यन्हु मपाः व्यवधान व समस्याया कारणं सवारी साधनया धनीतय्सं असहज परिस्थितिया सामना यायेमाला च्वंगु दु ।

छुं नं सामान न्यानाः उकियात मीगु ज्याय् नेपाल आयल निगम असफल सिद्ध जूगु दु । निगमदुने करोडौंया भ्रष्टाचार दु, चुहावत दु, तर सरकारं थःम्हं अनुसन्धान समिति दयेकाः समितिं ब्यूगु सुझावयात लागू मयासे निगमं मागय् याःगु धेबा जक बियाः सरकार थःम्हं निगमयात स्यंकेगु ज्या यानाच्वंगु दु । निगमदुने जुयाच्वंगु भ्रष्टाचार व चुहावतयात जक पनेफत धाःसां महिनाया करोडौं धेबा बचय् जुइ । तर सरकारं थुखेपाखे जानाजान ल्हाः मतसे भ्रष्ट कर्मचारीतय्गु संरक्षण यायेगुली हे फुकाच्वंगु दु ।

निगमदुने भ्रष्टाचार व चुहावनयात थीथी उपायत छ्यलाः पनेपैm धयातःसां सरकारं उकियात कार्यान्वयन यायेगु पलेसा भ्रष्ट कर्मचारीतय्त लिधँसा बियाः वयाच्वंगु दु । अनुसन्धान समिति ब्यूगु सुझावयात भ्वाथःगु दराजय् स्वथनाः निगमयात थप भ्रष्ट यायेत स्वयाच्वंगु दु । नेपाल आयल निगमं थः लिक्क लाःगु पार्टी व उया नेतातय्त द्वलंद्वः लिटर पेट्रोल सितिं इना वयाच्वंगु दु । कर्मचारीतय्त ६० लिटर मचिकं सितिं बियाः वयाच्वंगु दु । ढुवानी यानाहइगु ट्यांकरं लँ दथुं पेट्रोल तंकेगु यानावयाच्वंगु दु । सामान छगू न्याःसा दबल–तेब्बर बिल च्वकाः निगमयात टाट् पल्टय् याकेगु स्वयाच्वंगु दु । थुज्वःगु कथं लुटय् जुइगु जुयाच्वंगु निगमयात सुधार यायेगु पाखे सरकार छाय् न्ह्याःमवंगु ? खँ आः गोप्य मखुत । भ्रष्ट संस्थानत मध्ये निगम दकले न्ह्यःने दु । सुधार यायेहे चाहेमजूगु खःसा निगमयात खारेज यानाः पेट्रोल आयात यानाः आपूर्ति याकेगु जिम्मा सरकारं यायेगु त्वःताः सामान्य व्यापारीतय्त त्वःताः बीमाः । थथे याःसा म्होनिं सहजरुपं आपूर्ति जुइ व चिकंया नितिं न्हिच्छि निभाः पायेगु आवश्यक जुइमखु ।

More Stories Like this

पार्टी एकता छुकिया नितिं ?
चिकंया भाः कुहांवलं नं नेपालय् छाय् लागू मजूगु ?
संघर्ष समितियात सक्रिय याये
थौं मजदुर दिवस
जातीय पहिचानयात कयाः दलतय्गु दथुइ सहमति