नुवाकोटया स्कूलय् नं नेपालभाषा दुथ्याइगु जुल

नुवाकोट (सन्ध्या टाइम्स)/थनया झिगू स्कूलय् थुगुसीया शैक्षिक सत्रंनिसें नेपालभाषा दुथ्याकीगु जूगु दु। नेवाः वस्ती नेवाः स्कूल अभियान अन्तर्गत वंगु पुचलं बतार, त्रिशुली, विदुर नगरपालिकाया स्कूलया प्रधानाध्यापकतलिसे सहलह ब्याकाः उगु खँ क्वःछिउगु खःसा वंगु चैत्र १३ गते बतार, १४ गते त्रिशुली व विदुर नगरपालिकाया स्कूलया प्रधानाध्यापकतलिसे नं सहलह ब्याकेधुंकूगु दु ।

नुवाकोटया स्कूलय् नेपालभाषा दुथ्याकेगु थुगु अभियानया पहल नेवाः राजनैतिक अभियानया नायः शाक्य सुरेनं यानादीगु खःसा मोर्डन नेवाः स्कूलया प्रधानाध्यापक दिपक तुलाधर, जगतसुन्दर ब्वनेकुथिया डा. चुन्दा बज्राचार्य, रत्नदेवी कसाः, नेपालभाषा स्यनेकने पुचःया नायः रमिता शाक्य, न्वकु सानु महर्जन, दुजः राजेन्द्र रञ्जित, त्रिशुलीया भाषासेवी लक्ष्मण नेवाः, बतार पासा पुचःया दुजःपिं नं उपस्थित जुयादीगु खः ।

वय्कःपिंसं याकनं हे छगू प्रशिक्षण कक्षा चायेकाः नुवाकोटया प्रधानाध्यापक व शिक्षकतय्त तालिम बीगु योजना नं दुगु खँ कनादिल। सहलह कथं त्रिभुवन उच्च मा.वि. (त्रिशुली), भैरव उच्च मा.वि. (त्रिशुली), अर्केड एकेडेमी (बतार), जेन्डी बोर्डिङ्ग स्कूल (बतार), दिव्यरत्न बोर्डिङ स्कूल विदुरय् नेपालभाषा दुथ्याकेगु खँ जूगु खः ।