परिवेश (मुक्तक बाखं)

केदार सितु

बौम्हसिया उपदेश न्यनाः काय्म्हं लय्तायाः धाल - 'जिं नं यक्व आखः ब्वनाः धिबा यक्व कमय् याये ।'
काय्या खं मख्ख जूम्ह बौम्हं काय्याके न्यन - 'धिबां छु यायेगुलय् ?'
काय्म्हं लिसः बिल - 'बिस्कुट न्यायेगु !'

वंगलःसिमा

इमिगु छेँ दुने वंगलःसिमा छमा बुयावल ।
इपिं लय्ताल ।
छेँय् भिंगु शकुनया संकेत ताय्कल इमिसं ।
थुबलय् हे इमि परिवारय् दक्वसिबे कान्छाम्ह सदश्यया जागीर दत ।
म्ह्याय्म्हं बी. ए. पास यात ।
तःधीम्ह काय्या प्रमोशन जुल ।
वंगलःसिमाय् न्हिं-न्हिं लः बीगु व पुज्यायेगु नित्य कर्म जुल सकसियां ।
बुह्रा वइ, लः बी /
तःधीम्ह काय् वइ, लः बी /
म्ह्याय्म्ह वइ, लः बी /
चीधीम्ह काय् वइ, लः बी /

वंगलःसिमा आः तःमा जुल / तत्याः नं जुल / हा नं न्यनावन /
छन्हु, इमिसं खन - इमिगु छेँ छखां थाय्थासय् चिरिबायावयाच्वन ।
मेगु छन्हु, इमिगु छेँ छखां आकाझाकां पलिंनिसें छेलिथ्यंकं दुनाः पाःताः जुल ।
आः इमिगु छेँया थासय् अजंगगु वंगलःसिमा थिंग दनाच्वन ।

लिभिङ्ग स्टाय‍्ण्डर्ड

५०/६० लाख तुकाः वं छेँ दन ।
व छेँय् वं थः च्वनेत लायक मताल ।
छेँ छखां विदेशीतय्त बालं बिल ।
थः छकू क्वथा बालं कयाः च्वंवन ।

Related Stories

मर्निंग वाक्

More Stories Like this

बाखं च्वये मखुनी
बायावंगु लँपु
हेँग्वाः जूम्ह मनू
ब्लू-डल बाखं ब्वनेधुंकाः
तिमिला [चिबाखं]