तत्काल कार्यान्वयन मखु: प्रम

'जनसत्ता'या निर्णय खारेज हे यायेमाःगु कांग्रेस-एमालेया माग

येँ (सन्ध्या टाइम्स)/प्रधानमन्त्री डा. बाबुराम भट्टराईं सशस्त्र युद्धया इलय् माओवादी 'जनसत्तां' छेँबुँ न्याये-मीगु, अंशबन्डा व बकसपत्र बारे यानातःगु निर्णयत तत्काल कार्यान्वयन मयायेगु प्रतिबद्धता प्वंकादीगु दु ।

'जनसत्ता'या निर्णययात वैधता बिल धकाः प्रमुख प्रतिपक्ष नेपाली कांग्रेस व एमाले नापं मेगु चिचीधंगु दलतपाखें विरोध याना वयाच्वंगु अवस्थाय् प्रधानमन्त्री भट्टराईनं थौं उकियात तत्काल कार्यान्वयन मयायेगु प्रतिबद्धता प्वंकादीगु खः। प्रधानमन्त्रीया धापू उद्घृत यासें वय्कःया स्वकिय सचिव विश्वदीप पाण्डें संचारकःमितय्त धयादिल, 'सर्वोच्च अदालतं जारी याःगु अन्तरिम आदेश व विपक्षी दलया माग प्रति मध्यनजर यानाः जनसत्ताया निर्णय कार्यान्वयन मयायेगु जानकारी प्रधानमन्त्रीं बियादीगु दु ।'

थौं सुथय् सिंहदरवारय् प्रधानमन्त्री भट्टराईनं विपक्षी दलया नेतातय्त सःताः सहलह ब्याकुसें थ्व प्रतिबद्धता प्वंकादीगु खःसा कांग्रेस व एमालेया नेतातय्सं धाःसा जनसत्ताया निर्णययात बैधता बीगु सरकराया निर्णय खारेज हे यायेमाः धकाः माग याःगु दु। जनसत्ताया निर्णययात सरकारं मान्यता बीमाः धासें भूमिसुधार मन्त्रालयं छ्वया हःगु प्रस्तावयात मन्त्रिपरिषदं छुं दिं न्ह्यः जक पास याःगु खः। मन्त्रिपरिषद्या उगु निर्णयया विरोधय् विपक्षी दल कांग्रेस, एमाले नापं चिचीधंगु दलया नेतातय्सं सदनय् पंगः थना वयाच्वंगु दुसा सर्वोच्च अदालतं नं अज्याःगु निर्णय कार्यान्वयन मयायेत अन्तरिम आदेश बीधुंकूगु दु ।

थौं सुथय् जूगु सहलह ज्याझ्वलय् कांग्रेसया नेता रामचन्द्र पौडेल व एमालेया नेता माधवकुमार नेपालं सरकारया उगु निर्णय खारेज हे यायेमाः धकाः अडान कयादीगु खः ।

३२ दलया बैठक सःतीगु
संविधानसभाय् दुथ्याःगु ३२ दलया हे बैठक सःतीगु जूगु दु। संविधान निर्माणया झ्वलय् विवादित विषययात कयाः सहलह यायेत ३२ दलया बैठक सःतेगु खँ थौं च्वंगु संवैधानिक समितिया बैठकय् माओवादी, कांग्रेस व एमालेया नेतातय्सं कंगु खः ।

थौंया संवैधानिक समितिया बैठक जुइधुंकाः पिहां वनेगु झ्वलय् माओवादी अध्यक्ष प्रचण्डं इलय् हे संविधान जारी याये फइगु अवस्था दु धासें कनादिल 'संविधान दयेकेगु ज्या जुइ, सुनां दयेके फइ मखु धाल? अन्तिम इलय् वयाः छलफल तीब्र जुइ। उकियात कयाः दयेके फइ मखु धकाः आशंका यायेगु गलत खः ।'