नेवाःतय्त जागृत याइगु 'नेपाःमिया नुगः सः'

श्याम उदय

चःमति नेवाः खलः व चःमति बहुउद्देश्यीय सहकारी संस्था लि.या ग्वाहालिं पूर्णकाजी ज्यापुं थःगु हे म्येँय् संगीत तयाः 'नेपाःमिया नुगःसः' एल्बम पिथनादीगु दु। मुक्कं न्ह्यपु म्येँ दुगु 'नेपाःमिया नुगःसः' सीडीया म्येँय् आःतक झीगु भाषा ख्यलय् जुयाच्वंगु गतिविधि व झी गबलें पार जुइ मफुगु दुःख प्वंकातःगु दु। गुलिं म्येँय् भाषा आन्दोलनया न्ह्यलुवातय् प्रति असन्तोष व आक्रोस प्वंकातःगु दु ।

थौंतक भाषा, जाति, संस्कार संस्कृति थकाः झी नेवाःतय्सं गुलि खलः पुचः, पार्टी स्वन। व थापना जक जुल। खलः पुचःतय्सं नवाइगु भाय् नेपालभाषा खः। पार्टी व पार्टीया कार्यकर्तातय्सं न्ववाइगु भाय् नं नेपालभाषा हे खः। अथे नं सः गथे जुयाः छिन्नभिन्न जुल? झी नेपाःमिया सः गथे जुयाः छगू हे लय, छगू हे तालय् पिमज्वल? 'नेपाःमिया नुगःसः' सिडीं थ्व न्ह्यसः थनाच्वंगु दु। अथे जुयाः हे जुगल डंगोलया लय सानुबाबु महर्जन, जुगल डंगोल, रत्नशोभा महर्जन व दीपा महर्जनपिनिगु पुचः सलं धाइ - 'दँ दँ हे नेपाःमि'। सतिस महर्जनं जब ल्हाः छातिइ तयाः जय नेपाल धायेगु संस्कार, संस्कार जक मखु आः नी हे यानाः धायेमाः धाइ ।

'खः थ्व झीगु नेपाल सम्बत' पुचः म्येँ सतिस महर्जन, पवित्र कसाः, रत्न शोभा, दीपा महर्जनं हालातःगु दुसा लय पन्नाकाजी शाक्यं तयातःगु दु। अथे हे जुगल डंगोलया लसय् निसा देसारं हालातःगु 'देय्या अय्' म्येँ नं थुकी दुथ्यानाच्वंगु दु ।

नेपाःया थुवाः जुयाः नं नेवाःत गुबलें छप्पँ जुइ मफुगु खायूगु यथार्थ छखे दुसा थःगु हे आदिभूमिया भूमिपुत्रं थापना याःगु ने.सं. झीसं छ्यले मफुगु नं झीगु हे कमजोरी खः। अथे जूगुलि मांया दुरु त्वनातःगुया त्यासा पुलेत न खलः, पुचःत हे सय जुल न पार्टीया कार्यकर्ता न पार्टीया नायःतय्सं हे जिम्मेवारी क्यन। अथे जुयाः हे रत्नशोभां थ्व सिडिइ पूर्णकाजी ज्यापुं लय तःगु 'झीगु देय्या' म्येँ हाली। झी नेवाःत 'भिन्तुना भिन्तुना' धकाः भिन्तुना कालबिल यायेत व भिन्तुनाया म्ये हालेत गबलें लिउने मलाः। पूर्णकाजीया हे लसय् 'भिन्तुना' पुचः म्येँ खःसा संगीता शाक्यं हालातःगु 'सर्गतय् मुनाच्वंगु' म्येँय् शान्तिया आशा यायां बुद्धं ख्वबि हायेकूगु चित्रण दु ।

'नेपाःमिया नुगःसः' मूलतः नेवाः जातिया जागरण म्येँ खः। हरेक म्येँय् नेपाःया हीमी, दुःख व पीडा सुलाच्वंगु दु। थ्व पीडायात ब्वयाः नेवाःतय्त जागृत यायेगु उद्देश्य थुगु सीडीं ज्वनातःगु दु ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
खँ स्वनिगःया
नेपाल संवत्या आन्दोलनय् सरकारया बेइमानी