सिलु म्ये (चिपूखँ)

सुकु तसकं ब:लाम्ह व बां नं ला:म्ह ल्याय्‍म्ह ख: । वया देहेरचा (दँय्‍चा) ल्वाकेगु शोंख । न्ह्‍याबलें दँय्‍चा पंज: ज्वना समाया क्यबय् वनी । क्यवय् आलुबखरामा क्वय् दँय्‍चा पंज: दिकी । अले दँय्‍चायात लुखा चायेका बिइ । दँय्‍चा थ:गु भासं हाला पंज: च्वकाय् च्वं वइ । सिमाय् च्वँम्ह दँय्‍चा नं थ:गु मासं हाला हइ । अले दँय्‍चा ल्वाका जंगलि दँय्‍चा ज्वनेत व मेगु सिमाया ल्यूने सुलाच्वनी । वास्तवय् व क:सिइ वयाच्वंम्ह समा नापं मिखा ल्वाकाच्वनी ।

ज:लाख:ला काकि मिसि्र काकिं सुकु व समाया पह: स्यू । उकिं नं झ्यालं चिवा कयाच्वनी । वयापाखें भुनभुन खँ जुइधुंकूगुलि त्वा:यापिं ल्याय्‍म्हतय्‍सं नं थ्व खँ स्यू । उकिं अपिं सुकुचित दायेत ता: स्वयाच्वंगु दु । समा अथे सुकु नाप मतिना व्याका जूगु बाखनं अमिगु नुग: मुयाच्वंगु दु । अमि नुग: मूगु खँ सुकुं स्यू । अपिं नापं छन्हु दागादुगु जुइतिनि धयागु खँ नं सुकंु स्यू । उकिं व नं न्ह्‍याबलें ल्वायेत तयार जुयाच्वंगु दु ।

मिस्री काकिं झ्‍यालं हालाहइ – गन गनया भतुवा... जिमिथाय् ला दँय्‍चा ल्वाक: वयेगु.......।

सुकुं लिस: बिया छ्‍वइ– दँय्‍चा ल्वाकां छिमित छु जूगु दु लय् ?

– ख: दँय्‍चा: ल्वाकल । मिखा: प्वा: ल्वाकल का ? थुगु कथं मिस्री काकि नापं सुकुचिया कचकच नं बराबर जू । मिस्री काकि हालीबलय् क:सी च्वंम्ह समा मछाला द्‍वाहां वनी । सके वं मन मनं सरा: नं ब्यू जुइ – झोक्क नं मनीम्ह मिस्री काकि वयात छाय् मा:गु........।

मिस्री काकिया तसकं हे सह याये मज्यूगुलिं छन्हु वं त्वा:या ल्याय्‍म्हतय्‍त छुले याना छ्‍वयाह:गु दु । त्वा:या ल्याय्‍म्हत मुना थ:थाय् झ्या: क्वय् कालांकुलुं हालाच्वंगु समां ताल । वं खँ थुल । थ:थाय् द्‍वाहां वया सुकुयात दाइ धका वं हतपतं मूलुखा त्यूवन । मूलुखा तिनात:गुलिं ल्याय्‍म्हत प:खा गया सुकु नाप ल्वा: वल । सुकु थौ तसकं ल्वापु जुइ धका: सिल । उकिं व दँय्‍्‍चा पंंज: हतपत ज्वना समाया छेँय् थाहां वन । समाया क्वथाय् समा जक मेपिं सु मदु ।

– जंगली दँय्‍चा ब्वया वनी ना: थ्व पंज: छक: तयाति पंज: चायेके मते न्है । जंगली दँयचा ब्वया वनी ।

– अहो जंगली दँय्‍चा लाये धुंकूगु ला ?

– अँ आ: कुने व:पिं छम्ह निम्ह दत्तले छका वात का न्हि ।

– मूलुखा चायेका विस्यूंझासँ ।

– अथे विस्यू वनेत कायर ला जि ? हतपत कुने क्यबय् वया: सुकु हालाहाल

– का वा छिमि अवु, छम्ह छम्ह याना छ्‍वामवासें गन त्व:ते ।

जिमिथाय् त्वालय् वया छंगु आ:मुलि फुइँ का मखु ला का वा: । त्वा:या ल्याय्‍म्ह सुरे जुल । फुकस्यां सुकुयात हयेका: वन । सुकुं धमाधम अमित बस्वाना च्वन । मिस्री काकिं झ्याल स्वयाच्वंगु दु । समा नं क:सि स्वयाच्वंगु दु । सुकुं ध्वार्इध्वार्इ मुइका दुश्मन ल्याय्‍म्हतय्‍त ग्वतुकाच्वंगुलिं जुइ वया लय्‍ता व: थें च्वं ।

मिस्री काकि हालाच्वंगु दु – झोक्क नं मनीम्ह गनयाम्ह भतुवा कर्िंिथाय् त्वालय् वया ल्वा: वये छा:गु का अय् । ल्वायेधुंका सुकु समाया क्वथाय् वन । समाया न्हिला ख्वा: व: । वया: सुकुयात फ्‍यतु धायेमास्ते व: । व सुकुं न्ह्‍य:ने झ्या: फलय् तयात:गु दँय्‍चा पंज: काल । अले धाल – छंत न थथे हे पंजलय् तया: यंकेमानी का जिं ।

– उँ.........................।

समां छु लिस: बीमफुत । सुकु सरासर प्याम्ह वन । फुर्ति पिकया ल्वानाच्वन । मनूत हुलहुल दु । पसल्या: त तीन थाना दुरदुर याना: हाला लहर या: वयाच्वंगु दु । हाहाहुहु जुयाच्वंगु दु । अज्या:बलय् लाक छम्ह मचायात द्‍वहनं थक्कर नकल । सुकुं खन, मचा समाया किजा ख: । व मचायात बुल । समाया थाय् यंकल । आ: समाया मां नं क्वथाय् च्वनाच्वंगु दु ।

– धा: छु जुल पुतायात ? मांम्ह दना वल ।

– छु जुल ? धका समा नं दना वल ।

– द्‍वहं ल्वा: थाय् स्व: वनाच्वन थें द्‍वह नं थक्कर नकल का ।

– घा: घी ला मजु ला ? मांम्हं न्यन ।

– घा: ला मजू छय्‍नय् प्व: वल का । बँय् क्वपसांपुल सुकुं धाल ।

– मा:गु स्व:वंगु ला अज्या: थाय् मांम्हं मचायात ब्व: बिल ।

– छुं ज्या मदु थनयापिनि म्वा:साम्वा:सां द्‍वहं ल्वाकाल .... उखुन्हु नं छम्ह मिसा गणेद्यके वंम्ह थस्सपा: वं द्‍वहन च्वया ।

– व हे ला, म्वा: मदु ज्या मचानापं अज्या: थाय् द्‍वं ल्वा: थाय् गब्ले वनेमते धायेगु मखु ला छंत । मांम्ह हाल ।

आ: वनी मखुत का .... का दिसँ न्है । थुलि धया सुकु वन । समाया आशा दु सुकुया पंजलय् वयाच्वने दइतिनी कन्हय् न व दँय्‍चा ल्वाकेत वइतिनि वइतिनि... ।

More Stories Like this

ल: पापी तिति त्याउँ