ईलोहं प्रकाशन झिंनिदँ क्यंगु लसताय् थीथी सिरपा देछा

ईलोहं प्रकाशन झिंनिदँ क्यंगु लसताय् म्हिगः छगू ज्याझ्वःयासें नेपालभाषाया थीथी ख्यलय् योगदान यानादीपिंत थीथी सिरपालं हनादीगु दु ।

मचा साहित्यया विकासया निंतिं नीस्वनातःगु 'ईलोहं ज्ञानज्योति सिरपा' थुगु दँय् मचा साहित्यकार भाजु तेज प्रकाश श्रेष्ठयात लःल्हानादिसें हनादीगु दु । मूपाहाँ नेपालभाषा एकेडेमिया चान्सलर डा. सत्यमोहन जोशीं ईलोहं प्रकाशनया पिथनाय पिदंगु थीथी च्वसू मध्येलय् बीगु 'ईलोहं एल्भीस जोशी सिरपा' भाजु सन सायमियात अथेहे 'नःलि प्रधान सिरपा' भाजु तेजेश्वर बाबु ग्वङ्गयात लःल्हानादीगु खः । सिरपाया राशि छसिकथं न्याद्वः व छतका, निद्वः व छतका व न्हय्द्वः व छतका लिसें हनापौ देछाःगु खः ।

अथेहे ईलोहं पतिइ पिदंगु च्वसू मध्ये न्याम्हेसित लःल्हाइगु 'ईलोहं सायमि सिरपा' निजला बज्राचार्य, जगत सुन्दर ब्वनुकथिया ब्वँमिपिं सुजिना श्रेष्ठ, मन्जित खाती, बृहस्पति विद्यासदन नक्साःया पल्पसा शाक्य व श्री सत्यसाई शिक्षासदन तोखाया न्हूजः कृष्ण महर्जन व 'ईलोहं निवन्ध सिरपा' महांकाल मा.वि.या ऐलिना शाक्ययात म्हतिं द्वःछि व छतका दां सिरपा लःल्हाःगु खः ।

ज्याझ्वलय् मूपाहाँ डा. सत्यमोहन जोशीं ईलोहं प्रकाशनया अंग्रेजी भाययान्हूगु लय्पौ 'दी नेवारल्याण्ड'या विमोचन यानादिल । प्रकाशनया थ्व लयपौ न्हय्गूगु पिथना खः । अथेहे भाजु पुष्परत्न ताम्राकारया बाखं मुना सफू 'सिउँयावंगु सर्गः' भाषाथुवाः चित्तरंजन नेपालीं विमोचन यानादीगु खः ।

ईलोहं प्रकाशनया प्रवन्ध निर्देशक व ईलोहं मचा लय्पौया प्रकाशक भाजु नरेशवीर शाक्यया सभापतित्वय् जूगु ज्याझ्वलय् पेजथ्रीया सम्पादक भाजु दर्शनवीर शाक्यं लसकुस यानादीगु खःसा नेवाः स्वायत्त राज्य मंकाः संघर्ष समितिया नकिं डा. चुन्दा बज्राचार्यं नं थःगु नुगः तयादीगु खः । ज्याझ्वः विराजकाजी राजोपाध्यायं न्ह्याकादीगु खः ।