सरकारं यकःति कथं हे ल्याः क्वःछीगु
ऊर्जामन्त्री पोष्टबहादुर बोगटीं कांग्रेस व एमाले सहमतिइ मवःसा सरकारं यकःति कथं हे ल्याः क्वःछीना लडाकु वर्गीकरण प्रक्रिया न्ह्याकेगु धयादीगु दु ।
बुधवाः येँय् ग्वसाः ग्वःगुसाक्षात्कार ज्याभुवलय् न्ववानादिसें ऊर्जामन्त्री बोगटीं शान्ति प्रकृया व संविधान निर्माण सहमतिइ जुइमाःगु जूसां नं बाध्यताय् सरकारं छगू तर्फी कथं हे जूसां नं ल्याः क्वःछीना जूसां नं बर्गीकरण प्रकि्रया न्ह्याइगु धयादीगु दु ।
माओवादीया कारण शान्ति प्रकि्रया मदीगु दाबी यानादिसें कांग्रेस व एमालें शान्ति चाहय् मजूगुलिं पंगः जुयाच्वंगु वय्कःया धापू खः ।
प्रधानमन्त्री डा. बाबुराम भट्टराईया हे नेतृत्वय् शान्ति प्रक्रियायात लिच्वलय् थ्यंकेगुकथं थःपिं सरकारय् वयागु दाबी यानादिसें माओवादी उकिइ क्वमिलु जूगु धयादीगु खः ।
सेना समायोजन विशेष समितिया दुजः नापं जुयाच्वनादीम्ह नेपाली कांग्रेसया नेता डा. रामशरण महतं जनसेनाया रिगु्रपिङय् वनेन्ह्यः समायोजनया मापदण्ड दर्जा निर्धारण जिम्मेवारी व पुनःस्थापना प्याकेजय् सहमति जुइमाःगु धयादीगु दु ।
वय्कलं दलतदथुइ सहमति मजुसे यकःति ढंगं रिगु्रपिङ यायेगु खँ जनता झंगः लायेगु योजना जूगु दाबी यानादीगु दु । माओवादी पार्टीदुनेया अन्तरसंघर्ष क्यनाः शान्ति व संविधान निर्माण ज्यायात समस्याय् लाकेगु षड्यन्त्रय् वंगु द्वपं बियादिसें डा. महतं प्यदँ न्ह्यः हे लःल्हायेमाःगु ताःचा आः लःल्हायेगुलिइ लडाकु समायोजनलिसे छु नं स्वापू मदुगु धयादीगु दु ।
नेकपा एमालेया प्रचार विभाग प्रमुख प्रदीप ज्ञवालीं प्रधानमन्त्री डा. बाबुराम भट्टराईया ब्यक्तिगत कुतलं जक शान्ति प्रक्रिया न्ह्याये मफइगु धयादीगु दु । नापं वर्तमान प्रधानमन्त्री भट्टराईं थःगु पार्टीया नायः झलनाथ खनालं थेंहे सिंहदरबारय् किपाः यख्खायेगु बाहेक छु नं यायेमफइगु ज्ञवालीया बिचाः खः ।
