नेपालय् ६.८ रेक्टर स्केलया भुखाय्, म्होतिं २० म्ह सित (भिडियो सहित)

भुखाय्‌या केन्द्रविन्दु सिक्किम, म्होतिं २० म्ह मनूत सित

थौं सनिलया करीव ६:२६ बजे येँ लगायत देय्या थीथी शहरय् तःभुखाय्या कम्पन जुल । बि.सं. १९९० साल लिपाया हे दकलय् तःधंगु थुगु तःभुखाय् जःलाखःला देय् भारतया सिक्किम राज्यय् केन्द्र विन्दु दयेकाः ब्वःगु खः । ६.८ रेक्टर स्केल मापन याःगु थुगु भ्वखाचं देय्या दक्व हे थासय् असर याःगु दु ।

भुखाचं येँय् व धरानय् याना न्याम्ह मनूत सीगु दुसाः सिक्किमय् सीपिनिगु ल्याः प्यम्ह, पश्चिम बंगालय् प्यम्ह, नालन्दाय् छम्ह, दरबंगाय् छम्हनापं यानाः सीपिनिगु ल्याः म्होतिं २० थ्यंगु दु । भुखाचं यानाः येँया बेलायती राजदुतावासया पःखाः नं दुंगु दु । पःखाः दुनां साजन श्रेष्ठ, अनिता श्रेष्ठ व वीर बहादुर माझी सीगु दु । अथेहे धरानय् सन्तोष परियार व विमल परियार सीगु धाःगु दु । ख्वपय् स्वखाः छेँ दुंगु दुसाः स्याङ्गजाय् निखाः छेँ क्षति जूगु दु । भुखाचंयाना पर्साया रानी दरवार नं दुंगु दु ।

येँय् घाःपाः जूपिंत मनमोहन मेमोरियल अस्पताल व वीर अस्पतालय् वासः जुयाच्वंगु दु । भुखाचं याना येँय् छझाः दक्वं हे टेलिफोन अवरुद्ध जूगु खःसा आः सुचारु जुइ धुंकूगु दु ।

थ्व भुखाय्या कम्पन बंगलादेशय् नं थ्यंगु दु । बंगलादेशया चित्तगामय् थ्व भुखाय्या कम्पन जूगु खः । नेपालमण्डल डटकमया बंगलादेश संवाददाता मय्जु रोजिना अवालेया कथं अनया ६:४३ बजे थ्व भुखाय् ब्वःगु खःसा अन नं ६.८ रेक्टर स्केल हे मापन याःगु खः । आः अन लँय् यक्व हे एम्बुलेन्स ब्वाँय् वनाच्वंगु दु । भुखाय्या केन्द्र विन्दु सिक्किम बंगलादेशया राजधानी ढाकां ४९५ किलोमिटर जक तापाः ।

(किपा - भुखाचं दुंगु बेलायती राजदूतावासया पःखाः , किपामि - विनोद जोशी/एपी)

लाजिम्पात सपिंग मलय् भुखाय् थथे खनेदत -