अर्थमन्त्री अनन्तयात नेवाःतय् माग
अर्थमन्त्री वर्षमान पुन 'अनन्त'यात नेवाःतय् भाषा साहित्य लगायत विषयलय् थुगुसीया बजेट फ्यायेत नेवाःतय्सं माग याःगु दु ।
सिंहदरवारस्थित अर्थ मन्त्रालयलय् बिहीवाः नेवाः स्वायत्त राज्य मंकाः संघर्ष समितिया प्रतिनिधित वनाः अर्थमन्त्री अनन्तनाप उगु माग याःगु खः । मंकाः संघर्ष समितिया वर्तमान नायः डा. चुन्दा बज्राचार्यया नेतृत्वय् वंगु उगु पुचलं आः वइगु बजेटय् राष्ट्रिय विभूति शंखधर साख्वाःया नामं छगू कोष नीस्वनेत माग याःगु खः ।
संघर्ष समितिया सचिवालय कजि मल्ल के. सुन्दरं अर्थ मन्त्रीयात उगु कोष नीस्वनेत नापं प्रधानमन्त्री डा. बाबुराम भट्टराई नाप जूगु खँल्हाबंलाया लिधंसाय् नेपालभाषाया साहित्यया विकास यायेत बजेट फ्यायेत व सरकारं नेपालभाषा आकादेमीयात बियाच्वंगु ग्वाहालियात अप्वयेकेत माग यानादीगु खः ।
नेवाः प्रतिनिधितय् माग लिपा अर्थ मन्त्री अनन्तं नेवाःतय् माग सकारात्मक जूगु धयादिसें थःम्ह नेवाःतय् मागयात बजेटय् दुथ्याकाः सम्बोधन यायेगु लिसः बियादीगु खः ।
उगु प्रतिनिधिमण्डलय् मंकाः संघर्ष समितिया नायः डा. चुन्दा बज्राचार्य, सचिवालय कजि मल्ल के. सुन्दर नापं समितिया दुजः नापं सभासद् दिलिप महर्जन, दिल बहादुर श्रेष्ठ, नरेश ताम्राकार, सत्यनारायण मानन्धर, मंगल महर्जन, राजेश शाक्य लगायतया ब्वति दुगु खः ।
