विद्युत उत्पादन लिसे विकासया विशेष कुतः न्ह्याकल

येँ (झीगु स्वनिगः)

निर्माणाधीन आपालं जलविद्युत आयोजनायात निर्धारित ईदुने क्वचायेकेत सरकारं विशेष कुतः न्ह्याकूगु दु । लोडसेडिङया मार फयाच्वंपिं उपभोक्तायात राहत बिइत लिसे औद्योगिक क्षेत्रय् अप्वयाः च्वंगु ऊर्जाया माग पूवंकेत सरकारं थज्याःगु कुतः न्ह्याकूगु खः । बैंकया अप्वःगु व्याजदर, प्रसारण लाइनया अभाव लगायत थीथी कारणं इलय् हे ज्या न्ह्याके मदयाः अप्वःगु लागत खर्च व्यहोरय् यायेत लगानीकर्ता बाध्य जूगुलिं सरकारं गुम्ह दुजः दुगु उच्चस्तरीय समस्या समाधान समिति नीस्वंगु दु । विद्युत उत्पादनया क्षेत्रय् खनेदुगु फुक्क समस्या समाधान यायेत ऊर्जा मन्त्रालयं नीस्वंगु उगु समितिइ मन्त्रालयया प्रतिनिधि, नेपाल विद्युत प्राधिकरण, विद्युत विकास विभाग, स्वतन्त्र ऊर्जा उत्पादक, नेपाल ब्याङ्कर्स संघ व चीधंगु जलविद्युत उत्पादक संघया पदाधिकारीपिं खः ।

ऊर्जा मन्त्रालयया छ्याञ्जे बालानन्द पौडेलया कथं समितिं जलविद्युत उत्पादन लिसे उत्पादकया समस्या समाधान यायेत सरकारयात माःगु परामर्श बिइगुया लिसलिसे सरकार व निजी क्षेत्रदथुइ समन्वयकर्ताया भूमिका निर्वाह याइ । थौंकन्हय् देय्या थीथी भागय् न्ह्यसः मेगावाट क्षमताया नीच्यागू विद्युत परियोजना निर्माणाधीन दु । विद्युत विकास विभागं वंगु दा आपालं कम्पनीयात विद्युत उत्पादनया उजं नापं ब्यूगु खः । उगु हे दा विभागं प्यसः व न्यय्खुगू मेगावाटया तामाकोसी जलविद्युत परियोजना, ख्वीगू मेगावाटया माथिल्लो त्रिशुली ३ ए व स्वीनिगू मेगावाट क्षमताया राहुघाट परियोजनायात उत्पादनया स्वीकृति ब्यूगु खः ।

जलविद्युत परियोजनाया विकास लिसे लगानीया वातावरण दयेकेत सुरक्षा व्यवस्था सुदृढ जुइमाःगु आपालं आवश्यकता खनेदु । राष्ट्रिय लिसे अन्तर्राष्ट्रिय लगानी आकर्षण यायेत नं सुरक्षा न्हापांगु सर्त जूगु ऊर्जा मन्त्रालयया ल्यू छ्याञ्जे अनुप उपाध्यायं कनादिल । ऊर्जा क्षेत्रय् प्रत्यक्ष वैदेशिक लगानी दुकायेत लिसे स्वदेशी उद्यमीतय्त लगानीया नितिं प्रोत्साहन बिइत समितिया भूमिका महत्वपूर्ण जुइगु वय्कःया बिचाः खः ।छुं ई थुखे विद्युत उत्पादनया नितिं लगानी याःगु विदेशी संस्थातय्सं असुरक्षा महशुस यानाः वयाच्वंगु दु । भारतीय लगानीइ निर्माण याइगु गुसः मेगावाट क्षमताया माथिल्लो कणर्ाली परियोजनाया दैलेखस्थित ज्याकुथिइ छुं ला न्ह्यः मिं नयेवं विदेशी लगानीकर्ता झसुकाःगु खः । थ्यंमथ्यं झिंस्वंगू खर्ब न्यय्गू अर्बया लगानीइ दयेकीगु उगु परियोजनाय् नेपाःयात निःशुल्क नीन्ह्यगू प्रतिशतया शेयर लिसे सच्छि व च्यागू मेगावाट मत बिइगु भारतया प्रस्ताव देय्या समग्र हितय् दुगु ऊर्जा उत्पादनयात थःगु कार्य क्षत्र दयेकूगु क्लिन इनर्जी डेभलपमेन्ट बैंकया नायः धनञ्जय आचार्यं धयादिल ।

थ्वहे दथुइ, अख्तियार दुरुपयोग अनुसन्धान आयोगं माथिल्लो तामाकोसी जलविद्युत कम्पनीयात यान्त्रिक लिसे विद्युतीय उपकरण आयातया नितिं टेण्डरपाखें छनोटय् लाःगु कम्पनीया ज्या न्ह्यःने न्ह्याकेगु प्रकि्रया न्ह्याके उजं ब्यूगु दु । उपकरण न्यायेगु नितिं दकले म्हो धेबा न्ह्यब्वःगु अष्टे्रलियाली कम्पनी आन्डि्रयाज हाइड्रोयात उगु उपकरणय् हयेत ल्यःगु विरोधय् टेण्डर कायेमखंगु छुं छुं कम्पनीं अख्तियारय् उजुरी याःगु खः । टेण्डर प्रकि्रयाय् अनियमितता मजूगु अख्तियारं याःगु प्रारम्भिक अनुसन्धानपाखें पुष्टि जुइवं उगु कम्पनीलिसेया कार्यप्रकि्रया न्ह्यःने न्ह्याकेत माथिल्लो तामाकोसी जलविद्युत विकास कम्पनीयात उजं ब्यूगु कम्पनीं जानकारी ब्यूगु खः । यान्त्रिक लिसे विद्युतीय उपकरण आयातया नितिं आन्डि्रयाज हाइड्रों खुगू अर्ब पीखुगू करोड न्ह्यब्वःगु खःसा भारतीय कम्पनी आतस्टोमं खुगू अर्ब न्ह्यप्यंगू करोड मालीगु जानकारी ब्यूगु खः ।

More Stories Like this

सरकारं बिउबिजनय् अनुदान बीगु – राज्यमन्त्री यादव
मुद्रा अपचलनय् तःधंगु बैंकया नं ल्हाः
अन्तर्राष्ट्रिय बजारय् चिकंया भाः आपालं कुहांवल
अन्तर्राष्ट्रिय बजारय् चिकंया भाः आपालं कुहांवल
स्वंगूगु देय्पाखें नेपाः दुहांवइपिं पर्यटकय् वृद्धि