माओवादी स्थायी समितिया मुँज्या बिना निष्कर्ष क्वचाल
एकिकृत नेकपा माओवादी स्थायी समितिया मुँज्या बिना निष्कर्ष क्वचाल ।
माओवादी पार्टी ज्याकु पेरिसडाँडाय् च्वंगु उगु मुँज्याय् माओवादी लडाकुतय्गु ल्वाभः तयातःगु कन्टेनरया ताःचा लःल्हायेगु खँय् ब्वलंगु विवादया नापनापं मन्त्रीमण्डलय् पार्टीपाखें वनीपिनिगु नां धलः दयेकेगु विषयस सहलह जूगु खः ।
ताःचा लःल्हायेगु विषयस वरिष्ठ न्वकू मोहन वैद्य पक्ष व संस्थापन पक्ष चर्काचर्की जूगु खँ धाःगु दुसा वैद्य पक्षं केन्द्रीय समितिया मुँज्या सःतेत माग याःगु खः । शनिवाः च्वंगु मुँज्याय् झिंखुम्ह मध्ये अधिकांश नेतातय्सं शान्ति प्रकृयायात न्ह्यःने यंकेगु खँ बः बिउगु खः । अथे खःसा वैद्य पक्ष धाःसा थःपिनिगु अडानय् कायम हे जुयाच्वंगु पार्टी प्रवक्ता दिनानाथ शर्मां जानकारी बियादीगु खः ।
शनिवाःया मुँज्या विना निष्कर्ष क्वचायेवं थौं सुथसिया झिंछताः इलय् पदाधिकारीतयेगु मुँज्या व न्हिनसिया छताः इलय् स्थायी समितिया मुँज्या च्वनीगु खँ धाःगु दु ।
