प्रधानमन्त्री भट्टराईया थाय् नेवाःतय् प्रतिनिधिमण्डल
न्हूम्ह प्रधानमन्त्री डा. बाबुराम भट्टराईं न्हूगु बजेटय् नेपालभाषा सहित्य सम्बन्धी कोष नीस्वनेत बजेट फ्यायेगु प्रतिबद्धता प्वंकादीगु दु ।
नेवाः स्वायत्त राज्य मंकाः संघर्ष समितिया नेतृत्वय् बुधवाः प्रधानमन्त्री निवास बालुवाटारय् वंगु छगू डेलिगेशनं बजेटय् छुं परिमार्जन यायेगु खँयात प्रधानमन्त्री स्वयमं न्ह्यथनाच्वंगुलिं उकिइ नेपालभाषा उत्थानया निंतिं छगू कोष नीस्वनेत इनाप याःगु खः । लिसलय् प्रधानमन्त्री भट्टराईं नेपाःया इतिहासय् नेपालभाषाया तःधंगु योगदान दुगु व छगू महत्वपूर्ण भाय् जूगुलिं उकिया विकासया निंतिं थःम्ह बजेट फ्यायेगु प्रतिबद्धता प्वंकादिल ।
मंकाः संघर्ष समितिपाखें नेवाः समुदायया प्रतिनिधित्वयासें समितिया सचिवालय कजि मल्ल के. सुन्दरं न्ह्यब्वःगु थीथी प्यंगू मागयात कयाः लिसः बीगु झ्वलय् प्रधानमन्त्री डा. भट्टराईया थुकथंया स्पष्ट प्रतिवद्धता वःगु खः ।
अथेहे उगु प्रतिनिधिमण्डलं तत्कालीन पुष्पकमल दाहाल 'प्रचण्ड' नेतृत्वया सरकार दुगु इलय् भट्टराई नं अर्थमन्त्री कथं नेवाःतय् जात्रा पर्व सम्बन्धी याःगु सहमति व 'गुठी संस्थानया औचित्य व नेवाः संस्कृति संचालनय् खनेदुगु समस्या' बारे अध्ययन यायेत नीस्वंगु समितिं लःल्हाःगु प्रतिवेदन कार्यान्वयन यायेत नं इनाप याःगु खः ।
नेवाःतय् मागयात प्रधानमन्त्री भट्टराईं सकारात्मक रुपं कयादिसें न्हापा थः अर्थमन्त्री जुयाच्वंगु इलय् थःयात नेवाः समुदायया विरोधी कथं चित्रित यायेगु ज्या जूगु न्ह्यथानादिसें ताः ई निसें जाति व भाषा उत्थानया निंतिं ल्वानाच्वम्ह मनू नेवाः संस्कृतिया विरोधी जुइमफइगु धयादिल । वय्कलं उगु प्रतिवेदन व थःम्ह ल्हाःचिं तःगु सहमति कार्यान्वयन यायेगु प्रतिबद्धता नं प्वंकादिल ।
उकथं हे प्रतिनिधिमण्डलं संघीय राज्य घोषणा जुयाः नेवाः राज्य पलिस्था यायेगु कुतः जुयाच्वंगु इलय् स्वनिगःयात 'मेट्रोपोलिटियन सिटि' दयेकेगु व नेवाःतय्त हे अल्पमतय् लाकेगु कथं नगरपालिका घोषणा यानाच्वंगु ज्या तत्काल दिकेत इनाप याःगु प्रति नं प्रधानमन्त्री भट्टराईं उगु ज्या तत्काल मन्ह्याकेगु लिसः बियादीगु खः ।
अथेहे प्रतिनिधिमण्डलं न्हूगु सरकारय् स्वनिगः दुनेया नेवाःयात मन्त्री दयेकेत नं इनाप याःगु खः । प्रतिनिधिमण्डलय् संघर्ष समितिया वर्तमान नायः चुन्दा बज्राचार्य, सचिवालय कजि मल्ल के. सुन्दर, सल्हाकारपिं प्रा. माणिकलाल श्रेष्ठ, हितमान शाक्य, दिलिप महर्जन, प्रेम शान्ति तुलाधार, दुजःपिं दिलबहादुर श्रेष्ठ, नरेश ताम्राकार, सुजीव ब्रजाचार्य, नरेशवीर शाक्य, राजेश शाक्य, सुनाराजा शाक्य, उमेश स्थापित, मंगल महर्जन, किरण शाक्य, सत्यनारायण डंगोल, अनुप सिंह सुवाल, डा. गोपाल धौबंजाः, तीर्थ महर्जन, मुकेश मास्के, कुललाल डंगोल लगायतया ब्वति दुगु खः ।
