नेवाःतय् मसाल जुलुसय् प्रहरी हस्तक्षेप
नेवाः स्वायत्त राज्यया सुनिश्चितताया माग यासें नेवाःतय्सं शुक्रवाः पिकायेत्यंगु मसाल जुलुसय् प्रहरीं हस्तक्षेप यात ।
नेवाः स्वायत्त राज्य मंकाः संघर्ष समितिया ग्वसालय् सनिलय् ६ बजे येँया रत्नपार्कंय् मुनाः मसाल जुलुस पिकायेत तयार जुयाच्वंगु इलय् प्रहरीं फुक्कं मसालत थःगु नियन्त्रणय् काःगु खः । प्रहरीं च्वयेयाःगु आदेश धासें जुलुस पिकायेत पंगः थंगु खः । मसाल लितबिइत प्रदर्शनकारीतय्सं इनाप याःसां अझ आदेश मवनीगु धासें प्रहरी मसाल थःगु नियन्त्रणय् हे तयातयेवं छुं ई प्रहरी व प्रदर्शनकारीत दथुइ तनावया स्थिति ब्वलंगु खः ।
ताः ई तक प्रहरीनाप जूगु खँल्हाबंला लिपा नं प्रहरीं थःपिनिगु मसाल लतिमबिइवं नेवाः कार्यकर्तातय्सं हानं मेगू मसाल हयाः मसाल जुलुस पिकागु खः । रत्नपार्कपाखें हे न्ह्याःगु जुलुस असं, न्हू सतक, बसन्तपुली, मखं जुयाः जैसिदेवलय् वनाः क्वचाःगु खः । प्रदर्शनकारीतय्सं प्रहरी हस्तक्षेपया विरोध यासें अझ सशक्त आन्दोलन यायेगु खँ धाःगु दु ।
संघर्ष समितिया हे ग्वासलाय् कन्हय् यल ध्वखां, आइतवाः मध्यपुर थिमिं व सोमवाः किपूलीं मासल जुलुस पिकाइगु ज्याझ्वः दु ।
