सरकारपाखें काठमाडौं उपत्यका शहरी विधेयक स्थगित

नेवाःतय् बाहुल्यता दुगु स्वनिगःयात विकास यायेगु धकाः सरकारं हःगु काठमाडौं उपत्यका शहरी विकास विधेयक २०६५ नेवाःतय् विरोध लिपा सरकारं स्थगित याःगु दु ।

स्वनिगःया विकास यायेत हःगु धाःसां थुकिं स्थानीय नेवाःतय् हक अधिकार कुण्ठित याइगु धासें नेवाःतय्सं विरोध यायेवं सरकारं उकिया बारे सहलह यायेत नेवाः स्वायत्त राज्य मंकाः संघर्ष समितिया प्रतिनिधितय्त थौं सःतुगु खः । उगु सहलहसं संघर्ष समितिया प्रतिनिधितय्सं उगु प्रस्तावप्रति आपत्ति प्वंकेवं सरकारं विधेयक स्थगित याःगु खः ।

सहलहया झ्वलय् संघर्ष समितिया सचिवालय कजि मल्ल के. सुन्दरं शहरी विधेयक आदिवासी नेवाःतय् भावना अःख जूगु धासें उकियात तत्काल लितकायेमाःगु माग यानादीगु खः । संघर्ष समितिया सल्लहाकार डा. महेशमान श्रेष्ठं स्वनिगःलय् धःया व्यवस्था मदुगु व लःया व्यवस्था मदुगु खँ ध्यान मबिउसें सरकारं स्वनिगःयात झन् अव्यवस्थित व अस्तव्यस्त यायेत विधेयक हःगु द्वपं बियादिल ।

अथेहे संघर्ष समितिया मेम्ह सल्लहाकार नापं सभासद् हितमान शाक्यं न्हापा हे विकास जुयाच्वंगु शहरय् थज्याःगु शहरी विकास विधेयक म्वाःगु धयादिसें थुकिया पलेसाः विकास जूगु शहरयात व्यवस्थित यायेगु व्यवस्था यायेमाःगु धयादिल ।

संघर्ष समितिया प्रतिनिधितय् खँ न्यनेधुंकाः भौतिक योजना राज्य मन्त्री देवी खड्कां विधेयकया बारे स्थानीय नेवाःतय् खँ न्यनेत हे थुगु सहलह आव्हान यानागु धयादिल । वय्कलं स्थानीय जनताया आकांक्षा विरुद्ध सरकारं थुगु विधेयक लादे यानाः मयंकीगु धयादिसें शहरी विकास विधेयक उगु हे मुँज्यापाखें स्थगित जूगु धयादिल ।

उगु इलय् भौतिक योजना मन्त्रालयया सचिव पूर्ण कडेरियां स्वनिगःया समग्र रुपं विकास यायेगु निंतिं हे थुगु विधेयक हयाःगु खँ न्ह्यथनादीगु खः । मन्त्रालया प्रतिनिधित नाप जूगु सहलह लिपा संघर्ष समितिया दुजः सुजीव बज्राचार्यं शहरी विकासया नांमय् सरकारं तानाशाही व स्थानीय जनताया हक अधिकार लाकाकयेगु कथंया विधेयक हयेत्यंगुलिं थुकिया विरोध यायेमाःगु कनादिल ।

'विधेयकय् शहरी विकासया नांमय् स्थानीय मनूतय् जग्गा सरकारं कायेदइगु व उकिया विरोधय् अदालतय् तकं मुद्दा तयेमदइगु व्यवस्थात दुथ्याकाःगु दु' बज्राचार्यं धयादिल ।

सहलह लिपा आः न्हूगु विधेयक हये न्ह्यः सरकारं संघर्ष समितिनाप सहलह याइगु व संघर्ष समितिया सुझाव फ्वनाः जक उकिया हे लिधंसाय् न्हूगु विधेयक तयार याइगु जूगु दु । सिंहदरवारस्थित भौतिक योजना तथा निर्माण मन्त्रलाय् जूगु सहलहसं संघर्ष समितिया थीथी घटक खलः पुचःया प्रतिनिधितय् नं ब्वति दुगु खः ।

लुमंकेबहःजू, संघर्ष समितिं शहरी विधेयकया विरोधय् २०६६ साल जेठ १८ गते नेपालमण्डल बन्द यायेधुंकाः तत्कालीन माधवकुमार नेपालया सरकारं उगु विधेयक लितकाःगु खः । तर, वर्तमान झलनाथ खनाल नेतृत्वया सरकारं हानं उकियात हे न्ह्यःने हःगु खः ।