रोजीया लुमन्तिइ मैनबती जुलुस

यलया रोजी महर्जनया हत्या जूगु झिंस्वन्हुया पुण्य तिथिइ ज्यापु समाज यलं आइतवाः सीमतः च्याकाः जुलुस या:गु दु । महर्जन वंगु २० गते हे नल्लु जंगलय् स्यानातःगु जूसां नं २४ गते जक सीम्ह लुयावःगुलिं वहे दिंयात लुमंकाः झिंस्वन्हुया पुण्य तिथिइ ज्याभुवः ग्वसाः ग्वःगु खः । स्थानीयया ब्वतिइ बहनी न्याताः इलंनिसें यलध्वाखापाखें न्ह्याःगु सीमतः जुलुस मंगःबजाः, महापाः, पूच्व जुयाः कुपण्डोल थ्यंकाः क्वचायेकूगु स्थानीय मदन महर्जनं जानकारी बियादिल ।

तःननि मंकाः खलः त्वाः व स्थानीयबासीं हत्यारायात कडा कारबाही सुरक्षाया प्रत्याभूति व सीम्हसिया परिवारयात राहतया माग यानाः थीथी ज्याझ्वः ग्वसाःग्वःगु खः । रोजीया हत्याय् ल्हाः दुपिं प्यम्हसित नं ज्वनाः अनुसन्धान जुयाच्वंगु प्रहरीं जानकारी ब्यूगु खः ।