अनुसन्धान प्रविधि कार्यशाला गोष्ठी न्ह्यात
नेपालभाषा केन्द्रीय विभागया ग्वसालय् विभागया स्वीप्यदँ बुन्हिया लसताय् थनिंनिसें प्यन्हुयंकं अनुसन्धान प्रविधि कार्यशाला गोष्ठी ज्याझ्वः न्ह्याःगु दु ।
विभागया प्रमुख प्रा. प्रेमशान्ति तुलाधरया सभाध्यक्षताय् जूगु कार्यशाला गोष्ठीया उलेज्या मूपाहां विश्वविद्यालय अनुदान आयोग युजिसिया प्रमुख प्रा. डा. गणेशमान गुरुङं यानादीगु खः ।
ज्याझ्वःया उलेज्या यानादिसें डा. गुरुङं थी थी थासय् गुरुङ भाय् थौंकन्हय् न्हनावंथें नेपालभाषा नं न्हनावनी धका: थः तसकं चिन्तित जूगु खँ धयादिल ।
ज्याझ्वलय् पाहां नेपालभाषा विषय समितिया दुजः शिक्षाविद् लक्ष्मण राजवंशीं नेपालय् अनुसन्धानया ज्या म्हो जक जुयाच्वंगु खँ न्ह्यथनादिसें यदि सुनानं बाखंया विषयस विद्यावरिधी याःसा झिंन्याद्वः तका दां बीगु बचं बियादिल ।
उलेज्या ज्याझ्वः लिपा अनुसन्धान विषयस पुलांम्ह उपकुलपति प्रा. डा. केदारभक्त माथेमा व अनुसन्धान ढाँचा सम्बन्धि लुम्बिनी विश्व विद्यालयया उपकूलपति प्रा. डा. त्रिरत्न मानन्धरं प्रशिक्षण बियादीगु खः ।
प्यन्हुतक न्ह्याइगु थुगु कार्यशाला गोष्ठी डा. सुमन कमल तुलाधर, डा. दानराज रेग्मी, नृतत्वशास्त्री विहारी कृष्ण श्रेष्ठ, प्रा. डा. अजय विक्रम स्थापित, प्रा. डा. दयाराम सम्भव व प्रा. डा. हरिन्द्र थपलियापिन्सं प्रशिक्षण बीगु खँ धाःगु दु ।
