प्रधानमन्त्री खनालं थःगु पदपाखें राजीनामा
प्रधानमन्त्री झलनाथ खनालं थौं थःगु पदपाखें राजीनामा बियादीगु दु ।
प्रधानमन्त्री खनालं थौं बहनी जःछिपाः गुताः इलय् राष्ट्रपति डा. रामवरण यादवयात राजीनामा पौ लःल्हानादीगु खः । शान्ति संविधान व राष्ट्रिय सहमतिया निंतिं थःगु नेतृत्वया सरकार गठन जूगु धयादिसें प्रधानमन्त्री खनालं थःगु राजीनामा पतिइ खुलाया कार्यकालय् थःम्हेस्यां फक्व कुतः याःसा नं बिचायाःकथं प्रगति मजूगु खँ न्ह्यथनातःगु दु ।
वय्कलं न्यागू बुँदाया सहमति कथं राष्ट्रिय सहमतिया सरकार दयेकेगु लागि राजीनामा बियागु धयादिसें सहमतीय सरकार दयेकेगु लागि कुतः यायेगु धयादीगु दु ।
राष्ट्रपतियात राजीनामा पौ लःल्हायेधुंकाः संचारकःमितलिसे चीहाकलं खँल्हानादिसें प्रधानमन्त्री खनालं धयादिल, 'थौं राष्ट्रपतियात नापलानाः पौ बियागु दु, ल्यंदनीगु कन्हय् संसदय् न्ववायेगु जुइ ।'
थ्वहे झ्वलय् प्रधानमन्त्रीया प्रेस सल्लाहकार सूर्य थापां प्रधानमन्त्रीं राष्ट्रपतियात राजीनामा पौ लःल्हाःगु जानकारी बियादिसें कन्हय् च्वनीगु व्यवस्थापिका संसदया मुँज्याय् राजीनामाया औपचारिक घोषणा यासें शान्ति व संविधान दयेकेगु झ्वलय् जूगु अवरोधया बारे प्रधानमन्त्रीं थःगु बिचाः तयादीगु जानकारी बियादीगु दु ।
नेकपा (एमाले)या नायः झलनाथ खनाल एकीकृत नेकपा (माओवादी) लिसेंया दलतय्गु समर्थनय् वंगु माघ २० गते प्रधानमन्त्री पदय् निर्वाचित जुयादीगु खःसा साउन १६ गते माओवादीया न्हूपिं मन्त्रीतय्त सपथ ग्रहण याकेधुंकाः राजीनामाया लागि तसकं दवाब फयेमाःगु खः ।
प्रधानमन्त्री खनालं पार्टीया आचार संहितायात हाचांगाःगु धासें पार्टी दुनें हे माधवकुमार नेपाल व केपी शर्मा ओली पक्ष नापं कांग्रेस लिसेंया प्रतिपक्ष दलतय्सं राजीनामा माग याना वयाच्वंगु खः । वय्कलं माओवादीं शान्ति प्रकृया न्हयःने यंकेत ठोस पलाः ल्ह्वनेमा धइगु आसयं साउन २८ गते दुने शान्ति प्रकृया न्ह्याःमवंसा राजीनामा बीगु घोषणा यानादीगु खः । तर अपेक्षा कथं माओवादीं छुं नं प्रस्ताव महःगुलिं खनालयात राजीनामा बीत राजनीतिक व नैतिक दबाब अप्वयावंगु खः ।
