अन्तर्राष्ट्रिय बजारय् चिकंया भाः आपालं कुहांवल

नेपालय् गबले कुहां वइगु ?

येँ (झीगु स्वनिगः)

अन्तर्राष्ट्रिय बजारय् कच्चा चिकंया भावय् स्वीन्यागू प्रतिशत स्वयाः अप्वः कमी वःगु दु । अन्तराष्ट्रिय बजारय् मंगलबाः कच्चा चिकंया भाः प्रतिब्यारेल सच्छि व नीप्यंगू डलर अमेरिकी डलरपाखें कुहांवयाः च्यय्गूया हाराहारीइ कारोबार जूगु दु । युरोप लिसे अमेरिकाय् जुयाः वयाच्वंगु आर्थिक सङ्कटया कारण चिकंया भावय् निरन्तर गिरावट वःगु दु । विश्लेषकतय्सं थ्व दर प्रतिब्यारेल न्यय्गू डलरतक्क कुहांवयेफूगु धुकुमाः यानातःगु दु । कच्चा चिकंया भावय् अन्तर्राष्ट्रिय बजारय् कमी वःगुलिसे भारतं पेट्रोलियम पदार्थया भाः क्वःकायेगु तयारी याःगु दु ।

भारतीय तेल मन्त्री एस जैसपालं कच्चा चिकंया भाः कुहां वनाच्वन धाःसा पेट्रोलियम पदार्थया भाः म्हो यायेफइगु जानकारी नापं ब्यूगु खः । अन्तर्राष्ट्रिय भाः थहांवंगु त्वहः तयाः पेट्रोलियम पदार्थया मूल्यवृद्धि यानाः वयाच्वंगु नेपाल आयल निगमं अन्तर्राष्ट्रिय बजाः भाः स्वीन्यागू प्रतिशत स्वयाः आपालं कमी वःसां नं मूल्य समायोजन यायेगु तयारी याःगु मदुनि । निगमया प्रवक्ता मुकुन्द ढुङ्गेल भारतीय आयल निगल -आईओसी) लिसेया सम्झौता कथं अन्तर्राष्ट्रिय भाः कथं उमिसं पेट्रोल व डिजेल प्रत्येक महिनाया १ व १६ तारिखय् व मेमेगु इन्धनत प्रत्येक महिना १ तारिखय् भाः बिइगु जूगुलिं वइगु १६ तारिखय् जक भाः कुहां वइगु, मवइगु विषयलय् धायेफइगु धयादिल ।

लुा वहःयाःथें हे चिकंया भाः तुरुन्त क्वःकायेगु व थकाये मज्यूगु जानकारी ब्यूसें वय्कलं थौंकन्हय् निगमं लच्छिया न्ह्यछगू करोड पीन्यागू लख तका घाटा फयाः वयाच्वंगुलिं भाः कुहांवइगु सम्भावना न्यून दुगु बिचाः तःगु खः । निगम झिंखुगू अर्ब च्यय्निगू करोड तका अझ नं ऋणय् दुगु नं प्रवक्ता ढुङ्गेलं दाबी याःगु दु । उपभोक्ता अधिकारकर्मी ज्योति बानियाा अन्तर्राष्ट्रिय भाः कुहां वःबलय् नं नेपालय् भाः क्वःकायेगु खाय् निगम तयार मजूगु धइगु गैरजिम्मेवार ज्या जूगु धयादिल ।

More Stories Like this

सरकारं बिउबिजनय् अनुदान बीगु – राज्यमन्त्री यादव
मुद्रा अपचलनय् तःधंगु बैंकया नं ल्हाः
विद्युत उत्पादन लिसे विकासया विशेष कुतः न्ह्याकल
अन्तर्राष्ट्रिय बजारय् चिकंया भाः आपालं कुहांवल
स्वंगूगु देय्पाखें नेपाः दुहांवइपिं पर्यटकय् वृद्धि