लेखा समितिया दुजः, सभासद व नेतात हे सुकुम्बासी बस्तीया पक्षय्
संसदया सार्वजनिक लेखा समितिं ख्वपया मनोहरा खुसी सिथय् च्वंगु सुकुम्बासी बस्ती चीकेगु निर्णय माने मयायेत लेखा समितिया दुजः व मेमेगु दलया नेतातय्सं सुकुम्बासीतय्त इनाप याःगु दु ।
सुकुम्बासी सर्वदलीय संयन्त्र नापं मनोहरा सुकम्बासीतय्सं म्हिगः ग्वसाः ग्वःगु ज्याझ्वलय् समितिया दुजः नापं माओवादी केन्द्रीय दुजः टेक बहादुर बस्नेतं लेखा समितिं थ्वहे साउन १८ गते बिउगु उजं कार्यान्वयन मजुइगु धयादिल । लेखा समितिइ कृषि मन्त्रालयं प्रस्ताव यायेधुंकाः सुकुम्बासी चीकेत निर्देशन बिउगु धयादिसें समितिं थजाःगु उजं यक्व हे निकाययात बीधुंकूगु दु तर कार्यान्वयन मजूगु दावी यानादिल । नापं थुगु उजं नं कार्यान्वयन यायेमा धइगु आवश्यक मजूगु वयकःया धापू खः ।
अथेहे सभासद गगन थापा, नेकपा (एमाले)या पोलिटबिउरो दुजः खगराज अधिकारी, माओवादी पोलिटबिउरो दुजः हेमन्त प्रकाश ओलि, युवा संघया नायः महेश बस्नेत लिसेंया नेतातय्सं लेखा समितिया निर्णय गलत जूगु धाःसें वस्तीया विकल्प मबिकं चीके मफइगु खँ धाःगु दु ।
नेपालय् जक न्हय्छगू बस्तीइ स्वीच्यागू लख सुकुम्बासी दुगुलिइ स्वनिगलय् जक स्वीद्वःम्ह सुकुम्बासीतय्गु बस्ती दुगु उगु ज्याझ्वलय् जानकारी बिउगु खः ।
