गधा [ ध्याचु ]

सौरभ शाक्य

"गधा ! माफयाना दिसँ", जिं छितः धयाच्वनागु मखु न जिं गनं गधा खना सःता हे च्वनागु खः, न जिं गधा धकाः म्हुतु वानागु हे च्वनागु खः । गधा जिगु च्वसुया छयं खः । अय्नं सुनानं मखु जितः हे धाःगु खः धकाः सलं वान्याये थें जिद्दि याःसा जिं ला थुलि हे जक धाये - "गधा छम्ह प्यपां चूम्ह पशु खः । सोझाम्ह, धैर्यबानम्ह, धयागु खँ न्यनीम्ह सहनशील व शान्ति प्रियम्ह ज्या याना नइम्ह जनावर खः ।
छिके थुलि गुण दु ला ?"
"मरु हःला ?"
अय्नं छि तंचायाच्वंगु दु । तंचायेगु मनूया स्वभाब खः गधाया मखु । कवि नातिबज्रया कविता छक न्यनादिसँ सा !
"गधा थें ज्या याना जितः अति न्ह्यः व
सुनानं जितः गधा धालकिं जितः अति तंवः "

"गधा" आसे न्है तग्वः मिखा कनादिइमते ! गधाया इतिहास छकः सरर पुइके । गधाया प्राचीन इतिहास तसकं ताहा । धाये विश्वया सभ्यता हे गधा पाखें सुरु जूगु धाइ । न्हापा न्हापा बुद्धिमान मनूत ज्ञानी महापुरुषपिं सलय् च्वनेगु स्वयाः गधाय् च्वनाः थःगु सफर यायेगु लक्षण तायेकीगु खः । मिश्र देशय् ला गधायात तसकं सम्मान याना दुरुं म्वःल्हुकीगु चलन दु । थीथी देशय् थीथी प्रकारं गधायात सम्मान दु, गधायात गुलि सम्मान व इज्जत दु धयागु खँ अमेरिकाया डेमोक्राटिक पार्टिया चुनाव चिं स्वयेबले कुगाः । मङ्गोलियाय् ला न्हिं छकः गधा स्वलकिं वयागु ज्या फत्ते जुइ हँ । वास्तवय् गधा मूर्ख मखु ,सम्मान याये ल्वःम्ह पशु खः धकाः थीथी दसुं क्यना ब्यु । सुला खुँ वहे लुँ जुइगु जमाना खः थ्व । उकिं गधा नं मूर्ख उपाधि घानाच्वन धौबिया गधा घरका न घाटका जुयाः ।

जितः हे नं स्वले मानं ब्व ब्युसां गधा, बाःनं ब्वः ब्युसां गधा, अझ पासापिन्सं नापं अय् गधा धकाः हिस्याइगु । छितः नं सुनां गधा धयाः ब्वःब्यु ला "अय् गधा धया" धात्थें धायेगु सा आः तलय् जिं गधा व सल छुटे याये मफुनि धयां । उकिं धाये गधा मखु जि जुयाच्वन घरकान घाटका जुया । छकः ला बिचाः यायेगु जि थजाःम्ह ज्या यायेमास्ति मवःम्ह "फलाना थाय् छकः वना सामान छगू कया हजि धाइबले आसे कन्हय् वनेका" धाइम्ह ज्या अल्सीम्ह गधा गुकथं जुइ । गधायागु हे बेइज्जत ! थ्वला ज्या याना नइम्हसित ज्याखुँ धाये थें जुल । नत्रसा जितः गधाया छयंगुलिं भुनातःम्ह भौंचा धायेमाःगु खः । थ्व ला जनता ल्युने मदुम्हसित नेता धाये थें जुल । न्ह्यागु थजु जि गधा मखुसां गधा जुयाच्वना धाये नपाएको पगरी पुयाच्वना गधा धायेका । धात्थें धायेगुसा फुकं मनूतय्सं गधा थें ज्या यागुसा थौं देश गन थ्यन जुइ गुलि बिकास जुल जुइ दैश । देसय् खँ न्यानाच्वन ज्या मन्यानाच्वन । भिपिं सोझा सिधायात बांमलाःगु मिखां स्वया कुंखिनाः ब्वःबिइगुलि छ्यलाच्वन गधा धया । जिं ला तप्यंक धाये जिगु स्तर गधा थाय् मथ्यनि । जि थें जाःम्हसित गधा कि गधा धकाः धाइबले धात्थें गधा न्ह्यःने दुसा गुलि नुगलय् स्याकी ? जिं ला धाये थ्व गधा प्रति घोर अन्याः खः । गधा छम्ह चरित्रकथं व्यबहार छ्यलीम्ह जनावर खः अःखः मनूतय् चरित्र धोचायेगु जुयाच्वनी ब्यबहार फ्याकाध्वंया जुयाच्वनी । धात्थें देशय् बिकाश यायेगु खःसा थौं फुकं मनूत थःथःगु ख्यलय् गधा जुइमाःगु दु । गधा थें ज्या यायेमाःगु दु । तर मनूत गधा मजुसें खिचा जुयाच्वनी लुचा जुयाच्वनी खुँचा जुयाच्वनी । चितुवा, ध्वं धुँ जुयाच्वनी । अले देश ला छु बिकाश जुइ, छुतां म्वायेक हे गधातय्सं ब्वः फयेमालाच्वनी । ताखय् लाका गधातय्गु हत्या यानाच्वनी, नके स्याना शोषण यानाच्वनी । उकिं धाये गधा मूर्ख खः न मूर्खया प्रतीक खः न तुच्छम्ह पशु खः न हेलाया खँग्वः खः गधा । छगू उत्तिं दु छम्ह गधा ज्या न्हृयःने तयाः द्यनाच्वंगु खनाः मेम्ह गधां न्वात "छ गुबले निसें मनू जुयावयागु हँ ! का खुरुक्क दना ज्या या ।"

Related Stories

राजनिति मसिउम्ह काय्
थथे नं जुइयः [ ध्याचु ]

More Stories Like this

लाकां
थथे नं जुइयः [ ध्याचु ]
जः