बजेट छानबिन समितिं न्हय्न्हुया ई तनेत माग

ब्यवस्थापिका संसदय् न्ह्यःमब्वसे हे बजेट सार्वजनिक जूगु विषयसं छानबिन यायेत नीस्वंगु संसदीय समितिं न्हय्न्हुया ई तनेत माग याःगु दु ।

थौं च्वंगु समितिया बैठकं उपप्रधान लिसे अर्थमन्त्री भरतमोहन अधिकारी अस्वस्थ जूगु हुनिं प्रभावकारी ज्या यायेमफुगु जानकारी ब्यूसें वइगु १३ गते तक्कया नितिं ईया माग याःगु खः ।

साउन ८ गते च्वनीगु संसदया बैठकं जक थुकिया बारे निर्णय याइ । बजेट घोषणा यायेन्ह्यः हे सार्वजनिक जूगु धासें प्रतिपक्षी दलतय्सं विरोध यायेवं ब्यवस्थापिका संसदया बैठकं वंगु असार ३१ गते नेपाली कांग्रेसया प्रमुख सचेतक लक्ष्मण घिमिरेया संयोजकत्वय् खुम्ह दुजः दुगु छानबिन समिति नीस्वंगु खः ।