शान्ति प्रकृयाय् गम्भीर जुइत माओवादीयात कांग्रेसया इनाप
नेपाली कांग्रेसया सभापति सुशील कोइरालां माओवादी नायः पुष्पकमल दाहाल 'प्रचण्ड'यात शान्ति प्रकृयाय् गम्भीर जुइत इनाप यानादीगु दु ।
वीपी कोइरालाया स्वीक्वःगु स्मृति दिवसया लसताय् थौं येँया सुन्दरीजलय् ग्वसाःग्वःगु छगू ज्याझ्वःलय् न्ववानादिसें सभापति कोइरालां अहम् त्याग यानाः शान्ति व संविधान निर्माण प्रकृयाय् वयेत इनाप नापं यानादीगु खः ।
माओवादी उकिया अःखः दिशाय् वंसा लिच्वः नं गम्भिर वइगु वय्कलं ख्याच्वः नं बियादिल । कांग्रेस छक्वःपतिकं अधिनायकवाद विरुद्ध ल्वानाः वयाच्वंगु धयादिसें वय्कलं आः नं ल्वायेत तयार दुगु दाबी नापं यानादिल ।
थ्वहे दथुइ नेपाली कांग्रेसया नेता अर्जुन नरिसंह केसीं पार्टीदुनेया आन्तरिक गुटबन्दीं कांग्रेस कमजोर जूगु धयादीगु दु । नेपाली कांग्रेसं ख्वपया कटुन्जेस्थित गणेशमान बाटिकाय् ग्वसाःग्वःगु बुक्षारोपण ज्याझ्वःलय् न्ववानादिसें केसीं पार्टीया विचाःयात त्वःताः याःगु गुटबन्दीं पार्टी न्ह्यःने न्ह्यायेमफइगु बिचाः नापं तयादीगु खः ।
वय्कलं कांग्रेसय् गुटबन्दी हाबी जुयाः उकिया लबः मेमेगु दलं काःगु दाबी यानादिल । पार्टीइ नेताया चाकडी यायेगु प्रवृत्ति संस्थागत जूगु धयादिसें केसीं थःम्हं सुयागु नं चाकडी मयानागु हुनिं ल्यूने लाःगु धासें दुःख नापं प्वंकादिल ।
