दुर्घटनाय् छखाः हे छेँया प्यम्हलिसे च्याम्ह यात्रुत वेपत्ता
म्याग्दीया गलेश्वरपाखें सदरमुकाम बेनीपाखे वनाच्वंगु जीप कालीगण्डकी खुसिइ कुतुंवनाः छखाः हे छेँया प्यम्हलिसे च्याम्ह यात्रुत वेपत्ता जूगु दु । थौं सुथसिया झिंछताः इलय् ग। १ ज १२३९ ल्याःया ट्याक्सी कालीगण्डकीइ कुतुंवंगु खः । दुर्घटनाय् लानाः हिस्तान गाविस-२ घराम्दीया छखा हे छेँया स्वीनिदँया चुकबहादुर गर्बुजा वय्कःया जहान हेममायाँ झिंस्वदँया म्ह्याय् दीपा व निदँया म्ह्याय् दुर्गा वेपत्ता जूगु खः । अथेहे उगु हे थाय्या झिंप्यदँया माजु गर्बुजा दग्नाम गाविससं छेँ दुम्ह गलेश्वरय् च्वनाः वयाच्वंम्ह झिंछदँया दलबहादुर तिलिजा व घतान गाविस-६ गलेश्वरया चालक बेदप्रसाद सुवेदी वेपत्ता जुयाच्वंगु खः ।
ट्याक्सी सदरमुकाम बेनीनिसें थ्यंमथ्यं छगू किलोमिटर उत्तरय् दुगु अर्थुङ्गे गाविस-१ जलेश्वरलिक्क दुर्घटनाग्रस्त जूगु खः । दुर्घटनाया प्रत्यक्षदर्शीया कथं ट्याक्सी सतकपाखें थ्यंमथ्यं न्यय्गू मिटर क्वय् कालीगण्डकीइ कुतुंवंगु खः । बेपत्ता ट्याक्सीया ल्यूने मेगु ट्याक्सीइ यात्रा यानाच्वंपिं अनिता केसीं थ्यंमथ्यं नीगू मिटर पाःगु ट्याक्सी पाचाय् कुहांवनाः कालीगण्डकीइ वनाः वेपत्ता जूगु जानकारी बियादीगु खः ।
कालीगण्डकी खुसिइ दथुइ थानाच्वंगु ट्याक्सीयात यातायात ब्यवसायी रेडक्रसकःमि प्रहरी सेना लिसेया उद्दारकःमिं अन वनाः लिकाःसां नं यात्रु धाःसा लुयावःगु मदुनि । प्रहरीं मालेगु ज्या न्ह्यानाच्वंगु जानकारी ब्यूगु दु ।
