नेवाः मंकाः दबू छेँ दनीगु

नेवाः भाय् साहित्य, कला व तजिलजियात ल्यंकाःतयेगु व थपू यानायंकेगु आजु लिसें सकतां नेवाः समुदायया थपू यायेत ताःइलंनिसें महसुस यानाच्वंगु 'मंकाः छेँ' आः पूवनीगु जूगु दु ।

कविकेशरी चित्तधर हृदयं थजाःगु छेँ दनेमाःगु महसुसयासें न्हापा हे १० आना जग्गा दान बियातःगु खःसा थ्व जग्गा व नेपालभाषा मंकाः खलः,येँ नं थीथी इलय् थीथी ज्याझ्वः याना दयेकातःगु जग्गा नापं मुक्कं १ रोपनी १२ आना व २ पैसा क्षेत्रफलय् थ्व 'नेवाः मंकाः दबू छेँ' दनीगु जूगु खः ।


थौं च्वंगु छगू मुँज्यां थ्व छेँ दनेगुया निंतिं १७ म्हेसिया छगू तदर्थ समिति नं नीस्वंगु दु । 'नेवाः मंकाः दबू छेँ गुथि' नामं नीस्वंगु थुगु तदर्थ समितिया नायः भाजु पद्मरत्न तुलाधार जुयादीगु दु । अथेहे दुजः छ्यांजेय् भाजु नरेश ताम्रकार, दांभरि भाजु राजेन्द्रमान शाक्य व ल्यूछ्यांजेय् भाजु प्रविणलाल श्रेष्ठ च्वनादीगु दु । थुकथं दुजःलय् छसिकथं मल्ल के. सुन्दर, दुर्गालाल श्रेष्ठ, सुरेन्द्रवीर मालाकार, डा. पुष्पराज राजकर्णिकार, डा.सुमित्रा मानन्धर, प्रेमशान्ति तुलाधर, ई. मोहन कृष्ण डंगोल, रमेशमान पिया, ई. वीरेन्द्रमान शाक्य, नरेशवीर शाक्य, गणेशराम लाछि, नरेन्द्र भक्त हाडा व लजना मानन्धर च्वनादीगु दु ।

'नेवाः मंकाः दबू छेँ गुथि'या प्रस्तावित विधान नं सर्वसम्मतं पारित याःगु थुगु मुँज्यां जिल्ला प्रशासन कार्यालयय् दर्ता यायेत माःगु सकतां ज्याया भाला कायेगु व दर्ता प्रकृया पूवंका कार्यसमितियात विस्तार यायेगु खँ दुजः छ्यांजे व नेवाः देय् दबूया नायः भाजु नरेश ताम्राकारजुं नेपालमण्डल डटकमयात जानकारी बियादिल ।