फेसबुकं ब्यूगु बुदिंया उपहार

थौं कन्हय् न्ह्यागु हे ज्याझ्वः जूसां सामाजिक सञ्जाल फेसबुकपाखें 'इन्भाइट' यायेगु चलन दु । राजनीतिक ज्याझ्वः जुइमाः व व्यक्तिगत, इहिपाया जुइमाः व बुदिंया, दक्वं हे फेसबुक मार्फत ब्वनेगु चलन अप्वयावःगु दु ।

स्वयेबलय् ला थुकथं ब्वनपौ बीगु अपु थें च्वनेफु, तर होस् यानादिसं गबलें गबलें उगु हे फेसबुकपाखें छ्वःगु 'इन्भिटेसनं' छित तकसं कपा स्याके नं फु । अज्याःगु हे छगू घटना वंगु शुक्रवाः जर्मनस्थित ह्यामबर्ग शहरय् जुल ।

टिसा नांया छम्ह मिसां थःगु झिंखुदँया बुदिंया पार्टी हनेत फेसबुकपाखें हे 'इभेन्ट क्रियेत' यानाः 'इन्भिटेसन' छ्वःगु जुयाच्वन । थः पासापिंत जक छ्वयेगु धकाः चायेकूगु 'इभेन्ट' गल्तीवस् 'पब्लीक इभेन्ट' जुइवं टिसाया बुदिंलय् ब्वति काये धाइपिंनि ल्या १,५०० जवान थ्यन ।

उगु खँ टिसाया मांअबुं सीकेवं फेसबुक मार्फत हे उगु पार्टी मजुइगु धकाः मेसेज छ्वल । तर छक्व पार्टीया निंतिं वये धकाः कबुल यायेधुंकूपिं मनूतय्त उगु मेसेजं छुं हे लिच्वः मलाकू । धाथें हे टिसाया झिंखुदँया बुदिं कुन्हु द्व:छिं मल्याक मनूत टिसाया छेँ पिने जम्मा जुल ।

उगु भीड नियन्त्रणय् कायेत प्रहरी हे सतेमाःगु अवस्था तकं वल । 'टिसा गन दु, बुदिं हनेगु अपराध मखु' धासें उगु भीडं थःथवें हे टिसाया छेँ पिने पार्टी यात । तर टिसा धाःसा भीड जुइवं छेँय् हे मच्वंसें बिस्यूंवन । सम्भवतः थ्वहे जुइमा: बुदिंया लसताय् टिसायात फेसबुकं ब्यूगु तःधंगु उपहार ।

News Location:

More Stories Like this

कालिन्चोककु च्वापा होर (द्वाल्खा भाषा)
फेसबुकं 'नेवारी' खँग्वः लिकाल
'नेपालमण्डल डट कम भेटिकन सिटी स्वयां तःधं'
फेसबुकया संस्थापक जकरवर्ग नेपाः वःगु पुष्टि
फेसबुक छ्यलीपिं पचास करोड थ्यन