पारस शाहया मुद्दाया फैसला चैत २ गते
पुलांम्ह युवराज पारस शाहया मुद्दाया फैसला वइगु चैत २ गते जुइगु जूगु दु । बयानया निंतिं जिल्ला प्रशासन ज्याकू चितवन थ्यंकादीम्ह पुलांम्ह युवराज शाहनाप वयान कायेगु ज्या धाःसा क्वचागु दु । प्रशासन ज्याकू दुने वादी व प्रतिवादी वकिलतय्गु बहस लिपा मुद्दाया फैसला २ गते निर्णय यायेगु प्रमुख जिल्ला अधिकारी वसन्तराज गौतमं जानकारी बियादिल ।
पुलांम्ह युवराज शाहया समर्थकतय्सं धाःसा प्रशासन ज्याकू पिने नारा जुलुशया नापं पञ्चेबाजा थाना प्याखं हुगू खः । येँ नं सुथय् चितवन झायादीम्ह शाह थ्यंमथ्यं झिंछता इलय् चितवन थ्यंकादीगु खः । वय्कःया समर्थकत सुथय् झिता इलं निसें हे लसुकसया निंतिं नारायणगढया रामनगर थ्यंकूगु खः । छेँजःया दुजः नापं राजमार्ग जुया चितवन थ्यंकादीम्ह शाहं थःम्हं गाडी चलेयानादीगु खः । तसकं प्रसन्न मुद्राय् खनेदुम्ह पारशया समर्थकतय्सं थीथी व्यानर पम्प्लेट व बाजं थाना शाहया लसकुस याःगु खः ।
चितवनया टाइगर टप्स होटलय् वंगलादेशी नागरिक रुवेल चौधरीयात गोली कयेकूगु द्वपनय् ज्वंना जिल्ला ज्याकू चितवनं धरौटीं रिहा जुयादीम्ह पुलांम्ह युवराज पारस शाह तारेखया निंतिं थौं चितवन झायादीगु खः । शाहया सुरक्षाया निंतिं व्यापक सुरक्षाकर्मी परिचालन याःगु खः ।
मंसिर २८ गते पोखरां शाहयात चितवन हःगु खः । शाहयात २९ गते जिल्ला प्रशासन चितवनं झिद्वःतका धरौटी त्वःतूगु खः । वय्कःयात जिल्ला प्रशासन चितवनं फागुन १९ गते प्रशासनय् उपस्थित जुइमाःगु धासें तारेख ब्यूगु खः ।
