कृष्णप्रसाद भट्टराईया स्वास्थ्य अवस्था गम्भीर
नेपाली कांग्रेसया छम्ह जक जीवित संस्थापक नेता नापं पुलांम्ह प्रधानमन्त्री कृष्णप्रसाद भट्टराईया स्वास्थ्य थप गम्भीर जुइवं वय्कयात अचेत अवस्थाय् वंगु चान्हय् निसें कृत्रिम श्वासप्रश्वास जडान याःगु दु ।
येँया थापाथलीस्थित नर्भिक अस्पतालय् वासः यानाच्वनादीम्ह चय्न्हय्दँया नेता भट्टराईया हिइ कार्वन डाईअक्साइडया मात्रा अप्वयेवं वय्कः अचेत जुयादीगु खः । मंगलवाः चान्हय्निसें इलय् बेलय् अचेत जुयादीम्ह भट्टराईयात चिकित्सकतय्सं निगरानी अप्वयेकूगु दु । वय्कःया वासः यायेगु ज्याय् दुथ्या:म्ह चिकित्सक भरत रावतं इलय् बेलय् होसय् व:म्ह भट्टराईया अवस्था चिन्ताजनक जूगु जानकारी बियादीगु दु ।
भट्टराईया स्वास्थ्य जटिल जुइवं म्हिगः बहनीनिसें नर्भिक अस्पतालय् नेता व वय्कःया शुभेच्छुकत नापला:वयेगु अप्वःगु दु । थौं हे प्रधानमन्त्री झलनाथ खनाल अस्पताल झाया: वय्कःया उपचारय् छुं कथंया कसर मल्यंकेत इनाप यानादीगु दु । वय्कःयात नं चिकित्सकतय्सं भट्टराईया स्वास्थ्य स्थिर जूगु जानकारी या:गु खः ।
कांग्रेसया शीर्ष नेतात थौं नं सुथंनिसें अस्पताल थ्यंकूगु दु । सभापति सुशील कोइराला, नेतात विमलेन्द्र निधी, बालकृष्ण खाँड, खुमबहादुर खड्का नापंया नेतात अस्पताल थ्यंका स्वास्थ्य स्थितिबारे जानकारी कयादीगु खः । कांग्रेस सभापति कोइरालां संक्रमण जुइगु ग्याचिकुं थःम्हं भट्टराईयात नापमलासें चिकित्सकनाप जक जानकारी कया लिहाँवयेगु धाःगु दु ।
थ्वसिवें न्ह्यः राष्ट्रपति डा. रामवरण यादवं म्हिगः बहनी हे अस्पताल थ्यंका वय्कःया स्वास्थ्यबारे जानकारी कयादीगु खः । भट्टराई माघ २९ गते नर्भिक अस्पताल भर्ना जुयादीगु खः।
