मिस पानवतीया शुभमुहुर्त

भाजु अरुण दास श्रेष्ठया नेपालभाषाया न्हूगु संकिपा 'मिस पानवती' या म्हीग छगू ज्याझ्वःया दथुइ शुभ मुहुर्त जुल। सुजाता फिल्मस् प्रोडक्सनया ग्वसालय् परोपकारया यति पार्टी प्यालेसय् जूगु उगु ज्याझ्वलय् सन् २०१० या मिसा नेपाल सदीक्षा श्रेष्ठ मू पाहांकथं उपस्थित जुयादीगु खः।
भाजु सुरेन्द्र तुलाधरया च्वसा व निर्देशनय् निर्माण जुइत्यंगु संकिपा 'मिस पानवती' या मू भूमिकाय् मय्जु सनम श्रेष्ठ (नकिं) व भाजु सुरेश महर्जन (नायः) म्हितेत्यंगु खः ।

संकिपाया बाखंयात मोडर्न छेँया स्वकुमितय्सं यः मतायेकाच्वंगु कारणं बाखंचुइ न्हूगु सवाः बियाः न्ह्यब्वयागु खँ निर्देशक भाजुं कनादिल। निगू ब्वय् न्ह्याःगु उगु ज्याझ्वलय् नकतिनि हे पिदंगु आर.बि.सिंहया संकिपा 'जिगु मिखाया न्ह्यःने' या कलाकार, निर्देशक, गायक, संगीतकार व आर्थिक ग्वाहालि याःपिं सकसितं सुभाय्-पौ लःल्हायेगु ज्या जूगु खः। ज्याझ्वलय् वरिष्ठ फोटोग्राफर राजभाई सुवाल व आर.बि.सिंहपिंसं नेवाः संकिपाया विषयय् चर्चा यानादीगु खः ।

उगु ज्याझ्वःया दथुं वइगु फागुन ८ गते न्हापांखुसि अष्ट नारायण हलय् थुगु संकिपा प्रदर्शन जुइगु जानकारीलिसें चैत्र २५ गते गोपीकृष्ण, वैशाख ६ गते पोखरा लगायत थासय् प्रदर्शन जुइगु खँ ग्वसाः खलकं जानकारी बिउगु खः। नेवाः जागरण मञ्चया नायः सुजीव बज्राचार्यया सभापतित्वय् न्ह्याःगु उगु ज्याझ्वलय् सुरेश स्थापितं लसकुस यानादीगु खः। ज्याझ्वलय् न्वचु तयेगु झ्वलय् मू पाहां मय्जु श्रेष्ठं नेवाः भाय् मसःगुलिं थःतः मछिंगु खँ धासें लिपा जुइगु ज्याझ्वलय् थःगु उपस्थिति जूसा नेवाः भासं हे नवायेगु बचं बियादिल। वय्कः मय्जुं थौंकन्हय् थम्हं नेवाः भाय् सयेकाच्वनागु दु धइगु जानकारी नं बियादीगु खः ।

उगु ज्याझ्वःया लिपांगु ब्वय् 'जिगु मिखाया न्ह्यःने' संकिपाया छुं न्ह्यइपुगु लु नं प्रदर्शन याःगु खः ।