आहा ! कीर्तिपुर महोत्सव

- उत्सव प्रधान

आहा ! कीर्तिपुर महोत्सव
धात्थें फोहर सफा सुग्धर ।।
आः तक नं हे सुनां मस्यूनि
झीगु किपू दे "दु" धैगु
उकिं सकलें थःथःगु छेँपिवां वा
तोकू खतांमुग ईचा ज्वना
थःगु दे थःम्ह सफा यासें
गुलिजक बांला शब्द जाल
नगर पालिका दय्क दय्क नं
झीसं हे याये माःगु छुखः ताल
चःवि मदुपिंसं दर्खास्त तः दँ
माःगु व्यवस्था याये धाःगु दु
थःगु छेँया लुखा नं ध्वाखा थे चायेका
च्वफाः खिफा वैपिन्त स्वागत याये नु ।
देवी प्याखं दलू जात्रा वाघ भैरव धुँचा
स्वये मखंगु न्यने मनंगु झवाः मचाब्वैगु
त्वालं मस्यूगु, सुनां मस्यूगु थःम्हं हेनं मस्यूगु
त्वाय्कु त्वालय् न्यं छुंरे घोषणा याइगु
धाः बाजं धिमे बाजं वासुरी नं पुइगु
नाय्खिं वाजं, काहां बाजा नेकू नं पुइगुं
थकालीपिं गुरु पिन्त हाकु पतासि गाय्का
"लसकुस" हनाबना याःगु स्वये नमला ? -ननला)
चलंचोय् द्यः ब्वइ, जिवन चक्र च्वइ
ग्वरा मत नं च्याइ, लाय्कुलि न्वंवाइ
गुरुजु पिन्त न्यंसा सुनां धाःगु धाइ

ग्वसाः खलः याके न्यंसा मयाःसा छुयाय्ले धाइ ।
पत्रकार सम्मेलन हँ थःहे अलपत्र
लिसः मदुगु न्ह्यस तल थहे अस्पष्ट
वुद्धिजिवी युवा पुचः क्यन अतःमतः
प्यम्ह सिया महाजाल- महा उत्सव
कुटुझ्व त्वालय् किसन द्यो जात्रा जुइ हँ
फःफः स्वया च्वंगु दु कुटुझ्वःया गणे द्यः हँ
सुनां छु याइ स्वयेकाः जिं धकाः जूपिं दु हँ
यायेमाः धकाः ग्वाहालि बीपिं मदु नये द्यःत हँ
नयेत मदुगु तुकं माः झ्यालय् खाया ति हँ
फल्चा पतिं बुढापिंस भजन याना च्वं हँ
नगरपालिकाया ग्वाहालि ट्याक्टर व्यू हँ
वुद्धिजीवी न्हय्गू दलं तुलुतुलु स्व हँ
समय बजि विइगु हँ, हलमल पासा तयेगु हँ
"झीगु किपू झीगु तजिलजि" म्हसीके वीगु हँ
लखंलख पर्यटकं धन प्वंकावनीगु हँ
न्यान्हु तक भ्यय् भ्यय् लूगु जन्मकाछि लुमनी हँ
दवूचाय् गथां मुगः धंकाः भूत कँ वाइ हँ
लाखेपाः इन्द्रायणीया जात्रा तकं जुइ हँ
जामा वले द्यःखः क्यब्यूपिनि आतकं ब्वः स्याःनी हँ
धाइ पिनि अःपु धरग्वारा तःपु ग्वसाः खलकं मस्यू हँ

गनं म्हपूजा याना च्वनी, गनं किजा पुजा हँ
तता गन, किजा गनं, तःसि फल गन
बुसां निसें सीबलय् तक्कया संस्कार ब्वइगु गन
गनं नं हे मजूनिगु उत्सव जुइगु थन
गनं मदुगु जात्रा हाडिगामय् दु धाइ
नाफा वक जुक फुक्कं थःम्हं हे दु काइ
प्यपाः ख्वाः चूलाना धाये फुसा धा
गथे जुल याकःचिगु किपूमितय् मंकाः
सः व स्यूपिं किपू यापिं सुं हे वैत म्वाः हँ
जात्रा पर्व व्यवस्थापन समिति नं ग्याः हँ
लातां केरा स्वःथें स्वया पाकः ख्वालं पू हँ
याकःचा हे सना जूसां मंकाः कथं जू हँ
द्यः ध्वाखाय् सापारुया झ्यां झ्यां पापां जुइ हँ
बाजं मरु, ख्वाःपा मरु गथे याना जुइ हँ
धायेवं जुइसा, न्ह्यागुं जुइ ग्वसाः खलः म्वाः हँ
"म्हुतु स्वंया वा प्यांवः" ग्वस् खलः या हँ
अय्लाः थ्वँ यक्व दयेकी, माक्वः कया त्वंकी
न्हिला ख्वालं ज्याये सयेकी धाक्वं पुला थकी
मौका थ्व खः न्यान्हुया गाक्क दां थुंकी
मौकाय् चौका हृवाय्गु दाउ जिगु पाखें सय्कि
यकं धाला म्हितेला, वाकुचाःचा म्हितेला
धःकासा म्हितेला, ध्वाईं कासा म्हितेला

मचां निसें वुरी तक लय् लय्ताया म्हितेवाः
किपूमितये मोहनी धकाः भुतुमाली ब्वयेके वाः
नगरपालिका गन खः धकाः, कर्मचारी पालिका
छुं हे मयाः धायेत गये धाय् हाजिर न्हिं न्हिं याः
दयेकु दुयेकुं हे लँ पर्का जु जुं लिमलाः
सालु सानु, कृष्ण बाल ततः धाँपिं खःला

फुम्हे सिनं फुथें चाःथें चुक, ननी, गल्ली
मचा, वुरा, वुरी पिसं तकं न्ह्ाना जुरे कली
पर्यटकत द्वां वै झीथाय् दां पुला हुल
सिइके माःगु थ्व हे खँ खः दकसिवे भुल
चक्रपथं चाःह्यूगु थ्व किपू लागा झीगु
महोत्सव ज्वःछि यंकं झलमल ज्वीगु
किपूमित पिहां वया वार्याः च्वनीगु
महोत्सव हँ थ्व ऐतिहासिक ज्वीगु
धात्थेसित धाः धाःगु, माःम्हेसित माःमाःगु
पुरे याना बीगु जुइ, छिकपिन्त माःमाःगु
उजं जुल स्वरे देशय् जुजुं हे मयाःगु
किपू देया त्वाः वाहाः झःझः धायेका त्ये माःगु
ई फाय्त वाल्टीन वै खै फाय्त नं
छेँया फोहर नं वाल्टीनय् ती, ट्याक्टरं कावे हँ
भ्य भ्य्लुक त्वंका छो, अय्लाः लिसे थ्वँ
धःतकं सफाया ल्होंया बाः वै अय्लाः थ्वँ
न्हापा पद्मकष्टपुर आः कोरतिपुर
लिपा जुजुं स्वया हुंरे जुइ लटनापुर
प्यां बाहाः स्वया च्वंरे लाय्कु जुया वै
देशय् मरुम्ह जुजु स्वरे झीथाय् लुया वै
स्वये वले ग्वाज्यः थें च्वं तस्सः मजू खँ
जिगु खँ न्यं रे भाइ "त्वंले अय्लाः थ्वँ"
काये फुम्हं यक्वः का, त्वंके फुम्हं त्वंकी
मौका थ्व खः न्यान्हुया "दां प्वः मुंकी"
फक्वः स्यंकी त्वंका, अय्लाः थ्वं मुंकाः
ल्याः चीः याये लिपाझी महोत्सव धुंका
काये फुम्ह का, च्वाये फुम्हं च्वा
ल्वापु ख्यापु मदयेक न्हापा हे का
हाकु पतासि खः थ्वया थःगु धायेगु "चिं"
हाकु पतासि ध्वाँय् याना न्यान्हु यंकं व्वयेकी
पू मजूनिगु पतासि ख हाकुलं छु
न्यान्हुयंक चाह्य झासं पर्सि गायका जु
त्वःˆयूगु दु घोषणा याये लाखे तयेगु खँ
क्वःतः झाः न्यामा सिमा च्याःगु सुनां नं मखं
समल त्वाःया भेलु जात्रा अय्ला त्वंका भेलुइ
खँक्व सिनं, ताक्व सिनं अजू चाया मेलुइ
गःछेँ त्वालय् कापः थाइगु त्यांकां त्यांकां
द्यः ध्वाखाय् प्याखं ल्हुइगु झ्यां झ्यां पां पां
हानं पीगनय् च्वनीगु हं लाखे पाःपाः

लाय्कुलि पिहां वै हँ मिसा पायाः
हाकु पतासि च्वये च्वये पर्यटकत क्वये क्वये
महोत्सव सकसिनं दां पुलाः स्वये स्वये
न्हय्गू नाकां न्हय्गु ध्वाखां दांपुला वये वये
स्वनिगः मखं निसा किपुलिइ झाया खंके
गनं मदुगु लाय्कू स्वयेसा किपू स्वयां गाः
लः मदुगु पुखू स्वयेसा खासि स्वयां गाः
देय् पुखूलिइ म्येय् छं जात्रा सुनां याइगु ?
थुलि खलं घोषणा सभाय् धाये हे ल्वःमंगु ?
थाहां बालय् ध्वाखा दयेकी वुलुहुँ लाय्कू जुइ
किपूमित फुकसिनं तुलुंहुं तुलुं स्वयेगु जुइ
दुहां वनेत दां पुइकि, पिहां वयेत दां फुकि
वल-वन, वले वन लश्कर दक्को फुक्क मुंकि ।।

More Stories Like this

अस्तित्वया न्ह्यसः
ल्होंकि
जनता तयार जुइमाल
छगू भ्रम
पितं - स्वार्थ