केन्द्रया अनुमति कयाः आर्थिक ज्या जुइ मखु

यदि नेपाः संघीय व्यवस्थाय् वन धाःसा अबलय् गठन जुइगु प्रान्तीय राज्यतय्सं थःपिनि प्रान्तय् आर्थिक गतिविधि यायेत नं केन्द्रया अनुमति कायेमाः धइगु खँय् उच्चस्तरीय राजनीतिक संयन्त्रं सहमति दयेकूगु समाचार वःगु दु। संघीय व्यवस्थाया पक्षधरतय्त राजनीतिक संयन्त्रं याःगु थ्व निर्णय स्वीकार्य मजुइगु सम्भावना दु। छाय्धाःसां थःगु प्रान्त दुने आर्थिक ज्याखँ यायेगु लागिं तकं केन्द्रया अनुमति काये माःगु खःसा व ला संघीय व्यवस्था हे मखुत। संघीय व्यवस्थाया मर्मया पाय्छि अःखःगु बिचाः खः थ्व। प्रान्तय् आर्थिक विकास याना यंकेत हे संघीय व्यवस्था माःगु खः। यदि उकिया लागिं नं हानं केन्द्रया ख्वाः स्वये मालीगु खःसा उकिं संघीय व्यवस्थायात टिकाउ याइ मखु। संघीय व्यवस्थाय् उगु प्रान्त दुने दुगु प्राकृतिक स्रोतया अधिकार, उकियात परिचालन यायेगु अधिकार फुक्कं प्रान्तयात बीमाः। यदि थःथाय् दुगु स्रोत परिचालन यानाः आर्थिक आय आर्जन यायेगु ज्याया लागिं केन्द्रया अनुमति कायेमालीगु खःसा उकियात संघीय व्यवस्था मखु केन्द्रीय व्यवस्था हे धाये माली। केन्द्रपाखें हइगु आर्थिक परियोजना, राष्ट्रिय रुपं हे लिच्वः लाइगु आर्थिक कार्यक्रम लागू यायेगु सवालय् जक केन्द्रलिसे सरसल्लाह यायेगु प्रावधान पाय्छि जू। हरेक आर्थिक ज्याखँय् केन्द्रया अनुमति कायेमाःगु नियम पाय्छि मखु। संघीय व्यवस्थां सिर्जना याइगु प्रान्तत पूर्ण रुपं स्वायत्त व अन स्थानीय जातिया स्वशासन जुइमाः धइगु माग थ्व इलय् थ्वयाच्वंगु दु। केन्द्रयाके अनुमति कायेमाःगु प्रावधानं थ्व मागयात तप्यंक हे अस्वीकार याना बिउगु दु ।

More Stories Like this

प्वंकेमखंगु श्रद्धांजिल
सुवर्ण शाक्य कि सुवर्णकेशरी ?
लाःलाःथें भाःथकाये मजिल
बांलाःगु सुझावयात सुभाय्
बजटें छु राहत बी थें ?